بەلگىلى جازۋشى رافاەل نيازبەك ومىردەن وزدى

الماتى. قازاقپارات - اقىن، جازۋشى رافاەل نيازبەك 78 جاسىندا دۇنيەدەن وزدى، دەپ حابارلايدى قازاقپارات ءتىلشىسى.

قارالى حاباردى قازاقستان جازۋشىلار وداعى راستادى. رافاەل نيازبەك 1943 -جىلى 24-ناۋرىزدا جامبىل وبلىسى، تالاس اۋدانىنىڭ قازىرگى تامابەك اۋىلىندا دۇنيەگە كەلگەن. 1978 -جىلى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىن تامامدادى.

1967 -جىلى قازاق راديوسى ادەبيەت رەداكسياسىندا قىزمەتكە ورنالاستى.

1971-1977 -جىلدارى «جۇلدىز» جۋرنالىندا، 1977-1991 -جىلدارى «جازۋشى» باسپاسىندا رەداكتور بولىپ ىستەگەن.

ول - شەشەن رەسپۋليكاسىنىڭ ەڭ جوعارى مەملەكەتتىك «ۇلت نامىسى» وردەنىنىڭ يەگەرى، شەشەنستان مەملەكەتتىك جانە ءىلياس جانسۇگىروۆ اتىنداعى سىيلىقتاردىڭ لاۋرەاتى.

«قاراتاۋ مەن الاتاۋ»، «تەمىرقازىق»، «جالىن كەشكەن»، «جەر جانارى»، «وركەن»، «بيىكتەي بەر، تاۋلارىم»، «جەتىگەن»، «تامۇق وتىنا جانباعان»، «شەشەندەر»، «يچكەريا» اتتى جىر كىتاپتارى جارىق كوردى.