بۇرىنعى پرەمەر-مينيستر سەرىك احمەتوۆ بوستاندىققا شىقتى

نۇر-سۇلتان. قازاقپارات – ق ر قىلمىستىق اتقارۋ جۇيەسى كوميتەتىنىڭ باسپا ءسوز قىزمەتى قازاقستاننىڭ بۇرىنعى پرەمەر-ءمينيسترى سەرىك احمەتوۆتىڭ پروباتسيا ەسەبىنەن شىعارىلعانىن راستادى، دەپ حابارلايدى قازاقپارات ءتىلشىسى.

«2021 -جىلعى 1-قىركۇيەكتە س. ن. احمەتوۆ سوتتالۋ مەرزىمىن وتەۋىنە بايلانىستى جازانىڭ نەگىزگى ءتۇرى بويىنشا پروباتسيا ەسەبىنەن شىعارىلدى. قازىرگى ۋاقىتتا بەلگىلى ءبىر لاۋازىمداردى اتقارۋعا تىيىم سالۋ تۇرىندەگى قوسىمشا جازا بويىنشا قازىبەك بي اۋدانىنىڭ پروباتسيا قىزمەتىندە ەسەپتە تۇر»، - دەدى كوميتەتتىڭ باسپا ءسوز قىزمەتى.

ەسكە سالا كەتەيىك، 2015 -جىلى جەلتوقسان ايىندا قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى بۇرىنعى پرەمەر-مينيستر س. احمەتوۆ پەن باسقا دا لاۋازىمدى تۇلعالارعا قاتىستى ءىس بويىنشا ۇكىمى شىعاردى.

اتالمىش ءىس بويىنشا 7 ءتۇرلى ەپيزودقا سايكەس بارلىعى 21 ادام ايىپتالعان بولاتىن. سوت تالقىلاۋى 2015 -جىلعى 10-تامىزدا باستالىپ، ءتورت ايعا سوزىلدى. سوت تەرگەۋى مەن سوت جارىسسوزدەرى 2015 -جىلعى 9-جەلتوقساندا اياقتالدى. قاراعاندى وبلىستىق سوتىنىڭ قىلمىستىق ىستەر بويىنشا اپەللياتسيالىق سوتى 2016 -جىلدىڭ 14-ناۋرىزدا جەمقورلىق قىلمىستىق ىسكە قاتىستى سوتتى بولعان 11 ادامنىڭ جازاسىن جەڭىلدەتتى. سونىڭ ىشىندە سەرىك احمەتوۆتىڭ جازاسى 10 جىلدان 8 جىلعا دەيىن ازايتىلدى.