ىشكى ىستەر ءمينيسترى «نۇر وتان» پارتياسىنىڭ الاڭىندا ازاماتتاردى قابىلدادى
بۇل تۋرالى ق ر ىشكى ىستەر ءمينيسترىنىڭ رەسمي وكىلى نۇردىلدا وراز ءمالىم ەتتى، دەپ حابارلايدى قازاقپارات ءتىلشىسى.
«تىكەلەي ەفيردە ۆەدومستۆو باسشىسىنا وڭىرلەردەگى تۇرعىنداردان بەينەبايلانىس ارقىلى كوپتەگەن وتىنىشتەر ءتۇستى. ولار نەگىزىنەن قىلمىستىق ىستەردى تەرگەۋدىڭ ساپاسى مەن مەرزىمدەرىن ساقتاۋعا، جوعالعانداردى ىزدەۋگە، كوشى- قون زاڭناماسى مەن جۇمىسقا قابىلداۋ ماسەلەلەرىنە قاتىستى بولدى. قابىلداۋعا 2019 -جىلدىڭ قازان ايىندا تەمىرتاۋ - نۇر-سۇلتان تاس جولىندا جول اپاتىنان قازا بولعان ادامنىڭ اناسى جازىلدى. ايەلدىڭ ايتۋىنشا، تەرگەۋ مەرزىمى كەشىكتىرىلىپ، ءىس بىرنەشە رەت توقتاتىلعان ەكەن»، - دەدى رەسمي وكىل ءى ءى م باسپا ءسوز قىزمەتى الاڭىندا وتكەن بريفينگتە.
ونىڭ اتاپ وتۋىنشە، زارداپ شەككەن تاراپ تىكەلەي مينيسترگە جۇگىنۋىنەن كەيىن مينيسترلىكتىڭ تەرگەۋشىلەرى جۇرگىزگەن قوسىمشا جۇمىستاردىڭ ناتيجەسىندە ءىستى سوتقا جولداۋعا مۇمكىندىك تۋعان. قورىتىندىسىندا جۇرگىزۋشىنى باس بوستاندىعىنان ايىرۋعا ۇكىم شىعارىلعان.
«ءبىزدىڭ قايعىمىزعا بەي- جاي قاراماعانداردىڭ بارلىعىنا انالىق العىسىم شەكسىز. مەنىڭ 10 جاسار نەمەرەم اكەسىز قالدى. مەن شىندىق پەن شەكپەننىڭ ابىرويى ءسىز ءۇشىن ەڭ قىمبات نارسە ەكەنىنە قۋانىشتىمىن!» - دەپ مارقۇمنىڭ اناسى مينيسترگە جانە ءى ءى م-نىڭ تەرگەۋ توبىنا العىسىن ءبىلدىردى»، - دەدى ول.
سونىمەن قاتار رەسمي وكىلدىڭ ايتۋىنشا، ەلوردا تۇرعىنى ا ق ش-تا تۇراتىن كەلىنىن قۇجاتتاۋ ماسەلەسى بويىنشا ءوتىنىش بىلدىرگەن. ول امەريكا قۇراما شتاتىنداعى 27 جاستاعى كەلىنى وتباسى مۇشەسى رەتىندە ۋاقىتشا تۇراتىنىن جانە جۇكتىلىكتىڭ 9-ايىندا ەكەنىن جەتكىزدى. ولار قازاقستاننىڭ نيۋ-يورك قالاسىنداعى باس كونسۋلدىعىنا جۇگىنگەن كەزدە وعان جاڭا ءتولقۇجات راسىمدەۋدەن باس تارتىلعان. سەبەبى ول ق ر-نىڭ شەت ەلدەردەگى مەكەمەلەرى ارقىلى جەكە باسىن كۋالاندىراتىن قۇجاتتار راسىمدەۋ ساناتىنا كىرمەيدى. الەمدەگى ەپيدەميولوگيالىق جاعدايدى، سونداي-اق قازاقستان ازاماتشاسىنىڭ جاعدايىن نازارعا الا وتىرىپ، ءى ءى م قازاقستاننىڭ ا ق ش- تاعى كونسۋلىمەن نيۋ-يورك قالاسىنداعى باس كونسۋلدىقتا ءوتىنىمدى راسىمدەۋ تۋرالى ۋاعدالاستىققا قول جەتكىزدى»، - دەدى نۇردىلدا وراز.