عالىمدار سىرتقى قۋات كوزىنسىز جۇمىس ىستەيتىن جاساندى بۇيرەك ويلاپ تاپتى

نۇر-سۇلتان. قازاقپارات - امەريكالىق عالىمدار توبى، ا ق ش- تىڭ دەنساۋلىق ساقتاۋ دەپارتامەنتى جانە امەريكالىق نەفرولوگتار قوعامى اراسىنداعى بىرلەسكەن بۇيرەك جوباسى اياسىندا جاساندى بۇيرەك ءساتتى سىناقتان وتكىزىلدى.

بۇل تۋرالى كاليفورنيا ۋنيۆەرسيتەتى حابارلادى.

ءبىر ايتا كەتەرلىگى، بۇرىنعىدان ايىرماشىلىعى جاڭا جاساندى بۇيرەك - سىرتقى قۋات كوزى مەن سورعىنى قاجەت ەتپەيدى. ول اعزاداعى قاننىڭ تابيعي قوزعالىسى بويىنشا جۇمىس ىستەيدى.

جاساندى بۇيرەك قانداعى توكسيندەردى كەتىرەتىن كرەمنيلى گەموفيلتردەن جانە ادامنىڭ بۇيرەك جاسۋشالارىنىڭ بيورەاكتورىنان تۇرادى.

عالىمدار سونىمەن قاتار بيورەاكتورداعى بوتەن جاسۋشالارعا دەنەنىڭ يممۋندىق رەاكسياسى ماسەلەسىن شەشتى.

«يمپلانتاتتى قولدانۋشىلار ەندى دەنەنىڭ بوگدە جاسۋشالارعا اسەرىن باسۋ ءۇشىن يممۋنودەپرەسسانتتاردى قابىلدامايدى. ولار قاندى سۇيىلتاتىن دارىلەردى قاجەت ەتپەيدى. جاڭا كونسترۋكتسيانىڭ باستى ارتىقشىلىعى - ول سورعىسىز جۇمىس ىستەيدى، تەك قاننىڭ تابيعي قىسىمىندا، ياعني سورعىعا قاجەت باتارەيالار مەن باسقا قۋات كوزدەرىنە مۇقتاج ەمەس»، - دەدى ماماندار.

جاڭا جاساندى بۇيرەك سوزىلمالى بۇيرەك اۋرۋىنا شالدىققانداردىڭ ءومىر سالتىن جاقسارتا الادى.

بۇكىل الەمدە بۇل اۋرۋدان 750 ميلليوننان استام ادام زارداپ شەگەدى جانە جىل سايىن ميلليوننان استام ادام قايتىس بولادى. قازىرگى ۋاقىتتا مۇنداي ادامدار گەمودياليز پروتسەدۋراسىن قابىلداۋ ءۇشىن اپتاسىنا 3 رەت اۋرۋحاناعا بارۋعا ءماجبۇر.

بۇرىن عالىمدار جاساندى بۇيرەكتى جاساۋدا جۇمىس ىستەگەن، ءبىراق ءار جولى دەنەنىڭ يممۋندىق رەاكسياسىنا، قۇرىلعىنىڭ ىڭعايلىلىعى مەن سەنىمدىلىگىنە بايلانىستى كوپتەگەن ماسەلەلەر تۋىنداداعان بولاتىن.

massaget.kz