بوكستان ايەلدەر قۇراماسىنىڭ اينالاسىنداعى داۋ بويىنشا ارنايى كوميسسيا قۇرىلدى

None
None
نۇر- سۇلتان. قازاقپارات - بوكسشى انگەلينا لۋكاستىڭ 8- قىركۇيەكتەگى ۇندەۋىندە ايتىلعان ايەلدەر اراسىنداعى ۇلتتىق قۇرامانىڭ جاعدايىنا قىزمەتتىك تەكسەرىس جۇرگىزۋ ءۇشىن ارنايى كوميسسيا قۇرىلدى، دەپ حابارلايدى قازاقپارات ءتىلشىسى.

بۇل تۋرالى سپورت جانە دەنە شىنىقتىرۋ ىستەرى كوميتەتىنىڭ باسپا ءسوز قىزمەتى ءمالىم ەتتى. كوميسسياعا تاراپتاردىڭ ءۋاجى مەن ءىستىڭ ماتاريالدارىن قاراپ، مىناداي شارالار قابىلداۋ مىندەتى قويىلىپ وتىر:

- قازاقستان بوكس فەدەراتسياسى ۇلتتىق وليمپيادا كوميتەتىمەن بىرلەسىپ، سپورت ەتيكاسىن بۇزعانى ءۇشىن ەكى بوكسشى - نازىم قىزايباي مەن انگەلينا لۋكاستى ۋاقىتشا شەتتەتۋ ماسەلەسىن قاراستىرۋ؛

- سپورتتىق ءتارتىپتى بۇزۋ فاكتىلەرى بويىنشا وبەكتيۆتى تەرگەۋ جۇرگىزىپ، 20- قىركۇيەككە دەيىن سپورت جانە دەنە شىنىقتىرۋ ىستەرى كوميتەتىنە ۇلتتىق كوماندانىڭ باسەكەگە قابىلەتتى قۇرامىن جاساقتاۋ؛

- ايەلدەر قۇراماسى باس باپكەرىنىڭ راپورتى بويىنشا، دوپينگكە قارسى ۇلتتىق ورتالىقتىڭ ماماندارىن تارتا وتىرىپ، قۇراما كوماندا مۇشەلەرىنىڭ دوپينگ (تىيىم سالىنعان پرەپاراتتار) قولدانۋ مۇمكىندىگىنە تەكسەرۋ جۇرگىزۋ؛

- كومانداداعى پسيحولوگيالىق احۋالدى جاقسارتۋ، جانجالعا جول بەرمەۋ ءۇشىن پسيحولوگتاردى، مەدياتورلاردى تارتا وتىرىپ جۇمىس جۇرگىزۋدى ۇسىنۋ.

«ۇلتتىق وليمپيادا كوميتەتىنە بيىل 2- اقپاندا قابىلدانعان №524/21-ن س ك ەڭبەك شارتىنىڭ 5.3.18, 5.3.19 جانە 5.3.28-تارماقتارىن بۇزعانى ءۇشىن انگەلينا لۋكاستى تارتىپتىك جاۋاپكەرشىلىككە تارتۋ تۋرالى ماسەلەنى قاراستىرۋ جونىندە شەشىم قابىلداۋ ءۇشىن ۇسىنىس جاسالدى.

مادەنيەت جانە سپورت مينيسترلىگى الداعى ۋاقىتتا وسىنداي كەلەڭسىز جاعدايعا جول بەرمەۋ ءۇشىن فەدەراتسيالاردىڭ بارىنە كومانداداعى تاربيەلىك جۇمىستى كۇشەيتۋ قاجەتتىگى تۋرالى حات جولدادى. سونداي- اق، باس باپكەر ەرىك العابەكتىڭ ۇلتتىق قۇراماداعى باقىلاۋدى السىرەتكەنىن اتاپ ءوتۋ كەرەك. بۇل كومانداداعى سپورتتىق ءتارتىپتى جۇيەلى تۇردە بۇزۋعا الىپ كەلدى»، - دەپ جازىلعان كوميتەتتىڭ باسپا ءسوز قىزمەتى تاراتقان اقپاراتتا.

اۆتور: ەسىمجان ناقتىباي

سوڭعى جاڭالىقتار