اۋعانستانعا حالىقارالىق كومەك جەتكىزۋ ءۇشىن الماتىدا گۋمانيتارلىق حاب ۇيىمداستىرۋ كەرەك - توقايەۆ
مۇنداي ۇسىنىستى دۋشانبەدە ءوتىپ جاتقان ش ى ۇ- عا مۇشە مەملەكەتتەر باسشىلارى كەڭەسىندە ق ر پرەزيدەنتى قاسىم- جومارت توقايەۆ جاسادى، دەپ حابارلايدى قازاقپارات ءتىلشىسى.
«قازاقستان اۋعانستان بولاشاعىن ءوز- وزىمەن جانە ءوزىنىڭ كورشىلەرمەن بەيبىت ءومىر سۇرەتىن ناعىز تاۋەلسىز ءارى ءبىرتۇتاس مەملەكەت رەتىندە كورەدى. وسىناۋ تاعدىرشەشتى تاريحي ساتتە اۋعانستاننىڭ كوپ ۇلتتى حالقى تەڭدەسسىز قيىندىقتارمەن بەتپە- بەت جالعىز قالماۋى ءتيىس. ش ى ۇ ۇلكەن ىقپالىنىڭ ارقاسىندا بۇل ەلدىڭ بەيبىتشىلىك پەن كەلىسىمگە قول جەتكىزۋىندە بەلسەندى ءرول اتقارۋى ءتيىس دەپ سانايمىن. ۇجىمدىق كۇش- جىگەرمەن عانا قازىرگى سىن- تەگەۋىرىندەرمەن كۇرەستە وڭىرلىك قاۋىپسىزدىكتى قامتاماسىز ەتە الامىز»، - دەدى قازاقستان پرەزيدەنتى.
مەملەكەت باسشىسى قازاقستان ءوز تاراپىنان اۋعانستاننان باقىلاۋسىز كوشى- قوننىڭ ورىن الۋىنىڭ، دەسترۋكتيۆتى يدەولوگيانىڭ، ەسىرتكىنىڭ تارالۋىنىڭ جولىن كەسۋ ءۇشىن وڭىرلىك سەرىكتەستەرىمەن ءوزارا ءىس- قيمىلدى كۇشەيتەتىندىگىن باسا ايتتى.
«سونىمەن قاتار اۋعانستان تاپ بولعان وزەكتى گۋمانيتارلىق جانە ەكونوميكالىق پروبلەمالاردى شەشۋ ءۇشىن جان- جاقتى كومەك كورسەتۋگە دايىنبىز. قازاقستاننىڭ قولدانىستاعى ينفراقۇرىلىمدارى مەن لوگيستيكالىق مۇمكىنشىلىكتەرىن ەسكەرە وتىرىپ، اۋعانستانعا حالىقارالىق كومەك جەتكىزۋ ءۇشىن الماتىدا ش ى ۇ- نىڭ گۋمانيتارلىق حابىن ۇيىمداستىرۋدى ۇسىنامىز»، - دەدى قاسىم- جومارت توقايەۆ.
اۆتور: مارلان جيەمباي