ەلوردالىقتار ەركىن تۇردە ەمحانا تاڭداي الادى
جىل سايىن وتكىزىلەتىن ءداستۇرلى كامپانيا ەكى اي بويى، 15-قىركۇيەكتەن 15-قاراشاعا دەيىن سوزىلادى. بۇل تۋرالى قازاقپارات الەۋمەتتىك مەديتسينالىق ساقتاندىرۋ قورىنا سىلتەمە جاساپ حابارلايدى.
نۇر- سۇلتان قالاسى بويىنشا العاشقى مەديتسينالىق- سانيتاريالىق كومەك كورسەتەتىن 36 مەديتسينالىق ۇيىمعا تىركەلە الادى. ولاردىڭ 18 ءى - مەملەكەتتىك، قالعانى - جەكەمەنشىك كلينيكالار.
«تىركەۋ ناۋقانى كەزىندە ازاماتتار ءوزى تۇراتىن اۋماق شەڭبەرىندەگى مەملەكەتتىك قانا ەمەس، جەكە مەنشىك كلينيكالارعا دا تىركەلە الادى. ول ءۇشىن ەمحانا مەديتسينالىق ساقتاندىرۋ قورىنىڭ جەتكىزۋشىلەر تىزىمىندە بولۋى ءتيىس»، - دەيدى «الەۋمەتتىك مەديتسينالىق ساقتاندىرۋ قورى» ك ە ا ق نۇر- سۇلتان قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.
ەستەرىڭىزگە سالا كەتسەك، بيىلعى ناۋقان بارىسىندا ەمحانا اۋىستىرعان ازاماتتار ءوزى تاڭداعان ەمدەۋ مەكەمەسىنىڭ قىزمەتىن 2022 -جىلدان باستاپ پايدالانا الادى. جالپى، ەمحانا اۋىستىرۋ مىندەتتى ەمەس. بۇرىنعى ەمحانا قىزمەتىنە كوڭىلى تولاتىن ازاماتتار ءارى قاراي دا بۇرىنعى كلينيكانىڭ قىزمەتىن پايدالانا بەرسە بولادى. ەمحانا ءوزى قىزمەت كورسەتەتىن ايماقتان تىس جەردە تۇراتىن ازاماتتاردى، سونداي- اق، باستاپقى مەديتسينالىق- سانيتارلىق كومەك كورسەتەتىن مەكەمە جۇكتەمەسى شەكتەن اسىپ كەتكەن جاعدايدا تىركەۋدەن باس تارتۋى مۇمكىن.
قولدانىستاعى نورماتيۆتەرگە سايكەس، ۋچاسكەدەگى جالپى پراكتيكا دارىگەرىنە تىركەلگەندەر سانى 1700 دەن اسپاۋى ءتيىس. تىركەلگەن تۇرعىندار رەگيسترى دەرەكتەرى بويىنشا 2021 -جىلدىڭ 1 -قىركۇيەگىنە دەيىنگى ۋاقىتتا العاشقى مەديتسينالىق- سانيتارلىق كومەك كورسەتەتىن مەديتسينا ۇيىمدارىنا 1252009 ادام عانا تىركەلگەن.
ايتا كەتسەك، بيىل تىركەۋ تارتىبىنە ءبىرقاتار وزگەرىستەر ەنگىزىلدى. بۇدان بىلاي ەۋرازيالىق ەكونوميكالىق وداققا مۇشە مەملەكەتتەردەن كەلگەن ەڭبەك ميگرانتتارى ەمحاناعا تىركەلۋ ءۇشىن ەرىكتى مەديتسينالىق ساقتاندىرۋ ءپوليسىن ساتىپ الۋى ءتيىس.
ولار تىركەلۋ ءۇشىن ەمحانانىڭ تىركەۋ بولىمىنە بارىپ ءوتىنىش جازادى. تىركەۋ ناۋقانىنا قوردىڭ مالىمەتتەر بازاسىنا ەنگەن ەمدەۋ مەكەمەلەرى عانا قاتىسادى. ولاردىڭ تولىق تىزىمىمەن م س ق www.fms.kz رەسمي سايتى ارقىلى تانىسۋعا بولادى.