اسكەر كورگەن بالا ەرتەڭ اتا-اناعا ماسىل بولمايدى - ءماجىلىس دەپۋتاتى

None
None
نۇر- سۇلتان. قازاقپارات - پرەزيدەنت جولداۋىنداعى اسكەري بورىشتىڭ جاستاردىڭ ومىرىندەگى ورنىن نىعايتۋ تۋرالى باستاماسى زامان تالابىنان تۋىنداپ وتىر.

ق ر پارلامەنتى ءماجىلىسىنىڭ دەپۋتاتى، Qazaqstan Ardagerleri قاۋىمداستىعىنىڭ ءتوراعاسى باقىتبەك سماعۇل وسىنداي پىكىر ءبىلدىردى، دەپ حابارلايدى قازاقپارات ءتىلشىسى.

«وتاندى قورعاۋ - اتا زاڭىمىزدىڭ 36-بابى بويىنشا، ءاربىر ەر ازاماتتىڭ پارىزى دا، قارىزى دا. ءبىراق ءبىز وسى مىندەتتى لايىقتى اتقارىپ ءجۇرمىز بە؟ قازىرگى جاستار «اسكەرگە بارسام» دەگەن باعىتتا ەمەس، كەرىسىنشە، «اسكەردەن قالسام» دەگەن باعىتتا ءجۇر. كوبىنىڭ ويى اسكەري بيلەت تەك جۇمىسقا تۇرۋ ءۇشىن كەرەك دەگەنگە سايادى. قازىرگى الماعايىپ كەزەڭدە مەكتەپ قابىرعاسىنداعى العاشقى اسكەري دايىندىق ءپانىنىڭ ءرولىن كوتەرۋ كەرەك. ۇلدارىمىزدى ازامات رەتىندە قالىپتاستىراتىن قۇرالدىڭ ءبىرى وسى. قازىرگى «جاس سارباز» جوباسى دا وتە كەرەك. كەلىسىمشارت بويىنشا قىزمەت ەتەتىن اسكەريلەردىڭ كوبى قازىر ارمياعا بارىپ، سول جەردەن قالىپ جاتىر. سوعان بالانس ۇستاۋ ءۇشىن مەكتەپ قابىرعاسىندا اسكەري ءبىلىم مەن تاربيەنى ءسىڭىرۋ ماڭىزدى»، - دەدى دەپۋتات ۇلتتىق اكادەميالىق كىتاپحانادا وتكەن باسپا ءسوز كونفەرەنسياسىنىڭ الدىندا ب ا ق وكىلدەرىنە بەرگەن سۇحباتىندا.

Qazaqstan Ardagerleri قاۋىمداستىعىنىڭ ءتوراعاسى اسكەري بورىشىن وتەۋدەن جالتارۋ جايتتارىمەن ۇشىراسىپ تۇراتىنىن ايتادى.

«كەيدە ماعان تانىستار قوڭىراۋ شالادى. «بالامدى اسكەرگە شاقىرىپ جاتىر ەدى، الىپ قالۋعا بولماي ما» دەپ ءوتىنىپ ايتاتىندار بار. مەن ولارعا كەرىسىنشە اسكەرگە بارۋ بالانىڭ ءوز بولاشاعى ءۇشىن كەرەك ەكەنىن تۇسىندىرەمىن. اسكەرگە بارىپ كەلگەن بالا ەرتەڭ اتا- اناعا ماسىل بولمايدى. جىگىتكە جىگىتتىك سيپات بەرەتىن دە اسكەر. ول ومىردەن ءوز جۇگىن كوتەرىپ وتە الادى. اسكەرگە بارعان قاي بالا بولسىن، جەمقورلىقتان ادا، وتانىن سۇيەتىن ادام بولىپ شىعادى. جىراقتا ءجۇرىپ اتا-اناسىنىڭ، تۋعان ولكەسىنىڭ قادىرىن جەتە تۇسىنەدى. ساياسي ساۋاتتىلىق تا اسكەردە قالىپتاسادى. اسكەردە قارۋ اتۋدان باسقا دا كوپ دۇنيە ۇيرەتىلەدى ويتكەنى. وسى تۇرعىدان العاندا پرەزيدەنتىمىز قاسىم- جومارت توقايەۆتىڭ جاستارعا ومىردەگى ءوز ورنىن ارميا قاتارىندا ءجۇرىپ تاباتىنداي جاعداي جاساۋ تۋرالى باستاماسى وتە ورىندى دەپ ويلايمىن»، - دەگەن باقىتبەك سماعۇل بۇل ىستە ارداگەرلەردىڭ مەملەكەتپەن قاناتتاسىپ جۇمىس ىستەي الاتىنىن ەسكە سالدى.

«وعان ءبىزدىڭ اۋعان سوعىسىنىڭ ارداگەرلەرى ءتىرى ۇلگى رەتىندە ۇلەس قوسۋعا دايىن. ەلىمىزدە تۇڭعىش رەت «ارداگەرلەر تۋرالى» زاڭنىڭ قابىلدانعانىنا دا كوپ بولعان جوق. وسى تۇرعىداعى جۇمىستار جالعاسىن تاپسا، اسكەري بورىشىن ابىرويمەن ورىنداعان ازاماتتار لايىقتى قۇرمەت كورىپ جاتسا، سالاعا دەگەن قوعامنىڭ كوزقاراسى، جاستاردىڭ اسكەري بورىشىن وتەۋگە دەگەن ىنتاسى ارتادى»، - دەدى ءماجىلىس دەپۋتاتى.

اۆتور: ەسىمجان ناقتىباي


سوڭعى جاڭالىقتار