ەلوردادا جول اپاتىنان كەيىن جاپپاي توبەلەس بولىپ، ەكى جىگىت پىشاق جاراقاتىن الدى
وقيعا ورنىنا پوليتسيا جاساعى جىبەرىلدى، دەپ حابارلايدى قازاقپارات نۇر-سۇلتان قالاسى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
جانجالدىڭ جول اپاتى سالدارىنان بولعانى انىقتالعان. BMW كولىگىنىڭ 28 جاستاعى جۇرگىزۋشىسى سەمبينوۆ كوشەسىمەن كەلە جاتىپ، مانيەۆر جاساعاندا جول بويىندا تۇراققا قويىلعان، 21 جاستاعى جىگىت مىنگەن «Toyota» كولىگىمەن سوقتىعىستى.
جول-كولىك اپاتىنىڭ قاتىسۋشىلارى وقيعا ورنىنا دوستارىن شاقىرا باستاعان. جينالعاندار اراسىندا جانجال شىعىپ، ارتى توبەلەسكە ۇلاستى. ونىڭ ءبىرى ەكى جاس جىگىتكە پىشاق سالعان. اتالعان فاكتىمەن قىلمىستىق ءىس قوزعالدى.
29 جاستاعى كۇدىكتى نۇر-سۇلتان قالاسى پوليتسيا دەپارتامەنتىنىڭ ۋاقىتشا يزولياتورىنا قامالدى. كولىكتەر كوممۋنالدىق اۆتوتۇراققا قويىلدى. نۇر-سۇلتان قالاسىنىڭ پوليتسيا دەپارتامەنتى جۇرگىزۋشىلەردى جول ءجۇرۋ ەرەجەلەرىن قاتاڭ ساقتاۋ تۋرالى ەسكەرتەدى.
اۆتور: زارينا تۋعانبايەۆا