قىتايداعى جەر سىلكىنىسىنەن ولگەندەر مەن جاراقاتتانعاندار سانى جاريالاندى

بەيجىڭ. قازاقپارات - قىتايدىڭ وڭتۇستىك- باتىسىنداعى سىچۋان پروۆينسياسىندا بولعان 6 بالدىق جەر سىلكىنىسىنەن 3 ادام قازا تاپتى، 60 قا جۋىق ادام جاراقات الدى، دەپ حابارلايدى قازاقپاراتتىڭ مەنشىكتى ءتىلشىسى.

ق ح ر سەيسمولوگيا قىزمەتىنىڭ مالىمەتىنشە، جەراستى ءدۇمپۋى بەيسەنبى كۇنى جەرگىلىكتى ۋاقىت بويىنشا ساعات 04:33 تە سىچۋان (وڭتۇستىك- باتىس قىتاي) پروۆينسياسىنداعى لۋجوۋ قالالىق وكرۋگىنىڭ لۋشيان ۋەزى اۋماعىندا تىركەلگەن. جەر سىلكىنىسىنىڭ ەپيسەنترى - لۋشيان ۋەزىندە ءۇش ادام قازا تاپتى، تاعى 60 ادام ءتۇرلى دارەجەدە جاراقات الدى. 35 ءۇي قۇلادى، 190 عا جۋىق تۇرعىن ءۇي قاتتى زاقىمدالدى. اپات ايماعىنان 7 مىڭعا جۋىق تۇرعىن ەۆاكۋاتسيالاندى.

سىچۋان پروۆينسياسىنىڭ لۋشيان ۋەزىنە 1 ميلليوننان استام حالقى بار 20 عا جۋىق ەلدى مەكەن قارايدى. سونداي-اق جەر سىلكىنىسىنە بايلانىستى توتەنشە جاعداي ايماعىندا جولاۋشى پويىزدارىنىڭ قوزعالىسى توقتاتىلدى. وقيعا ورنىندا اپاتتى- قۇتقارۋ جۇمىسى جۇرگىزىلىپ جاتىر.

اۆتور: اياۋلىم التىنبەك