حالىق ساناعى: دەربەس دەرەكتەردى ساقتاۋ ءۇشىن كريپتوگرافيالىق قۇرالدار قولدانىلادى

None
None
نۇر-سۇلتان. قازاقپارات - ازاماتتاردىڭ حالىق ساناعى كەزىندە بەرگەن دەرەكتەرىن قاۋىپسىز ساقتاۋ ءۇشىن كريپتوگرافيالىق قورعاۋ قۇرالدارى قولدانىلادى، دەپ حابارلايدى قازاقپارات ءتىلشىسى.

بۇل تۋرالى ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى.

«حالىق ساناعىن جۇرگىزۋ كەزىندە جەكە دەرەكتەردىڭ قاۋىپسىزدىگىنە كەپىلدىك بەرىلەدى. ازاماتتاردان الىناتىن بارلىق اقپارات قورعالعان بايلانىس ارنالارى ارقىلى بيۋرونىڭ ورتالىق سەرۆەرىنە بەرىلىپ وتىرادى. ونداعى اقپاراتتى قورعاۋ ءۇشىن قازاقستان رەسپۋبليكاسىنىڭ ستاندارتى بويىنشا اقپاراتتى كريپتوگرافيالىق قورعاۋ قۇرالدارى قولدانىلادى»، - دەدى بيۋرو باسشىسى.

ال Sanag.gov.kz سايتىن قورعاۋ ءۇشىن Sectigo SSL سەرتيفيكاتى ساتىپ الىنعان كورىنەدى.

«وندا پايدالانۋشى مەن سەرۆەر اراسىندا دەرەكتەر الماسۋ قورعالعان https حاتتاماسى بويىنشا جۇرەدى. ۇلتتىق ستاتيستيكا بيۋروسىنىڭ بارلىق اقپاراتتىق جۇيەسى اقپاراتتىق-كوممۋنيكاتسيالىق ينفراقۇرىلىمنىڭ اسا ماڭىزدى وبەكتىلەرى تىزىمىنە ەنگىزىلگەن جانە ق ر ۇلتتىق قاۋىپسىزدىك كوميتەتىنىڭ «مەملەكەتتىك تەحنيكالىق قىزمەت» ا ق مونيتورينگىنە الىنعان. سونداي-اق، اقپاراتتاندىرۋ سالاسىنداعى زاڭناما تالاپتارىنا سايكەس اقپاراتتىق جۇيەنىڭ قاۋىپسىزدىك تالاپتارىنا سايكەستىگىنە سىناقتار جۇرگىزىلدى جانە وڭ ناتيجە الىندى»، - دەپ ناقتىلادى نۇربولات ايداپكەلوۆ.

ونىڭ ايتۋىنا قاراعاندا، «مەملەكەتتىك تەحنيكالىق قىزمەت» ا ق ساناق بويىنشا sanaq.gov.kz اقپاراتتىق رەسۋرستىڭ قول جەتىمدىلىگىنە تاۋلىك بويى مونيتورينگ جۇرگىزىپ، حاكەرلىك شابۋىلداردىڭ الدىن الىپ وتىر.

«العاشقى ستاتيستيكالىق دەرەكتەردىڭ ساقتالۋى مەن قۇپيالىلىعىن قامتاماسىز ەتۋ ق ر زاڭناماسىمەن رەتتەلەتىن پروتسەستەر شەڭبەرىندە زاماناۋي تەحنيكالىق قۇرالداردى پايدالانۋ ارقىلى جانە اقپاراتتىق قاۋىپسىزدىك سالاسىنداعى ۋاكىلەتتى ورگانمەن ىنتىماقتاستىقتا جۇزەگە اسىرىلادى»، - دەيدى ۇلتتىق ستاتيستيكا بيۋروسىنىڭ باسشىسى.

سوڭعى جاڭالىقتار