باتىس قازاقستاندا «جىر ءدۇلدۇلى - ماراباي» بايقاۋىنىڭ جەڭىمپازدارى انىقتالدى
ماراباي جىراۋدىڭ ەسىمىن اسقاقتاتۋ، رەسپۋبليكانىڭ باتىس وڭىرىندە كەنجەلەپ قالعان جىرشىلىق ونەردى جانداندىرۋ ماقساتىندا تەرەكتى اۋدانىندا وتكەن سايىسقا باتىس قازاقستان، اقتوبە جانە قىزىلوردا وبلىستارىنان 6 ۇمىتكەر قاتىسىپ، باق سىنادى.
بايقاۋعا بەلگىلى جىرشى، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى، قازاق ۇلتتىق ونەر ۋنيۆەرسيتەتىنىڭ پروفەسسورى، ونەر زەرتتەۋشىسى الماس الماتوۆ باستاعان قازىلار القاسى تورەلىك ەتتى.
ءبىرىنشى كەزەڭدە قاتىسۋشىلار جىر باسى مەن «قىز جىبەكتى»، ەكىنشىسىندە ءوز قالاۋلارى بويىنشا جىرلاردى ورىندادى.
بايقاۋ قورىتىندىسىندا قىزىوردا وبلىسىنان كەلگەن كۇنسۇلۋ تۇرىكپەن باس جۇلدەنى جەڭىپ الدى.
ورالدىق ساكەن جانعازييەۆ ءبىرىنشى، قىزىلوردالىق مارات سۇگىرباي ەكىنشى، اقتوبەلىك ءومىرحان جەتەسوۆ ءۇشىنشى ورىنعا يە بولدى. قىزىلوردالىق ماليكا الدامجاروۆا مەن باتىسقازاقستاندىق ەركەبۇلان ولجاعالي ديپلومانت اتاندى.
جەڭىمپاز-جۇلدەگەرلەر ارنايى ديپلوممەن، اقشالاي جانە كادە سىيلىقتارمەن ماراپاتتالدى.
مەرەيتويلىق ءىس-شارالار بارىسىندا قوناقتار ماراباي جىراۋ مۇسىنىنە گۇل شوقتارىن قويىپ، تاعزىم ەتتى.
ەسكە سالا كەتەيىك، بۇدان بۇرىن ەپيك جىرشى ماراباي قۇلجاباي ۇلىنىڭ 180 جىلدىعىنا وراي ءبىرقاتار شارا وتەتىنىن، اباي جوعارى باعالاعان ماراباي جىراۋدىڭ كەڭىنەن زەرتتەلۋى كەرەك ەكەندىگىن جازعان بولاتىنبىز.