قازاقستان شىڭعىس ايتماتوۆ تۋرالى دەرەكتى فيلم تۇسىرەدى
بۇل تۋرالى بۇگىن XVII ەۋرازيا مەديافورۋمىندا تەلەراديوكوروپوراتسيانىڭ باسقارما ءتوراعاسى ءلاززات تانىسباي ايتتى، دەپ حابارلايدى قازاقپارات ءتىلشىسى.
«قازاقستان» تەلەراديوكورپوراتسياسى ەلىمىزدەگى ەڭ ءىرى مەدياكومپانيا رەتىندە باۋىرلاس ەلدەردىڭ تەلەارنالارمەن تىعىز بايلانىس ورناتۋدا. وزبەكستاننىڭ Mening Yurtim, Yoshlar تەلەارنالارىمەن، تۇركيانىڭ TRT AVAZ، ت ر ت تەلەارناسىمەن، ءازىربايجاننىڭ AZ TV ارنالارىمەن كونتەنت الماسۋدى تۇراقتى جۇرگىزىپ كەلەدى. ورتاق مادەنيەتىمىز كورىنىس تاباتىن كوپتەگەن دەرەكتى فيلمدەر، تاريحي سەريالدار، جوبالار تۇركيا، وزبەكستان، ءازىربايجان ارنالارىندا كورسەتىلىپ وتىر. تەلەارنالارىمىز بەن راديولارىمىزدا «تۇركى الەمى» اتتى ۇزاق جىلدىق سيكلدىق حابارلار ءجۇرىپ جاتىر»، - دەدى ءلاززات تانىسباي «تۇركىتىلدەس ەلدەردىڭ بۇقارالىق اقپارات قۇرالدارى» اتتى دوڭگەلەك ۇستەلدە.
ءبىر جىل بۇرىن پاندەميا كەزىندە «قازاقستان» كورپوراتسياسى مادەني- رۋحاني باعىتتاعى Abai TV تەلەارناسىن اشتى. سوندا باۋىرلاس، تۇركىتىلدەس، كورشىلەس ەلدەردىڭ تاريحىنا، مادەنيەتىنە قاتىستى ءونىم الماسۋ ماقساتىندا بارلىق مەملەكەت وكىلدەرىنە سۇرانىسحات جولدانعان.
«سونىڭ ناتيجەسىندە Abai TV ەفيرىنەن تۇركيالىق ارىپتەستەرىمىز دايىنداعان بىرنەشە دەرەكتى فيلم كورسەتىلىپ جاتىر. ءبىز ولاردى دۋبلياجداپ، ءوز تىلىمىزدە كورەرمەنگە ۇسىنامىز جانە وزگە ەلدەردىڭ دە ونىمدەرىن قازاق تىلىنە اۋدارىپ، ەفيردەن بەرۋگە دايىن ەكەنىمىزدى جەتكىزگىمىز كەلەدى. تەلەيندۋستريا وتە قارقىندى دامىپ جاتقان قازىرگى كەزدە تەك كونتەنت الماسىپ قانا قويماي، تاجىريبە الماسقانىمىز دا وتە ماڭىزدى دەپ ەسەپتەيمىز. مىسالى ءبىزدىڭ كورپوراتسيا ماماندارى تۇركيانىڭ وزىق تەلەارنالارىنا ءجيى بارىپ تۇرادى، جاقىندا عانا كورشىلەس قىرعىزستاننىڭ تەلەارنالارىنىڭ باسشىلارى، ارىپتەستەرىمىز كەلىپ پىكىر الماستى، ستۋديالارىمىزدى كوردى، ورتاق مەموراندۋمعا قول قويدىق. ناتيجەسىندە قىرعىز تاراپىمەن بىرلەسىپ، ۇلى جازۋشى شىڭعىس ايماتوۆقا ارنالعان دەرەكتى فيلم ءتۇسىرىپ جاتىرمىز»، - دەدى كورپوراتسيا باسشىسى.
قىرعىز- قازاق بىرلەسكەن دەرەكتى فيلمى ەكى ەل اراسىنداعى تاريحي دوستىق قارىم- قاتىناستى ناسيحاتاتۋدى كوزدەيدى. لەيتموتيۆ رەتىندە شىڭعىس ايتماتوۆتىڭ شىعارماشىلىعى الىنعان. ونىڭ ەكى ەل اراسىنداعى بايلانىستى نىعايتۋ جولىندا اتقارعان ەڭبەكتەرى باياندالادى.
ءتۇسىرۋ توبى ش. ايتماتوۆتىڭ اۋىلى شەكەردە بولىپ، ونداعى ايتماتوۆتىڭ شىعارمالارىنا ارقاۋ بولعان دەرەكتى ورىنداردى ءتۇسىرىپ قايتقان. سونىمەن بىرگە ل. تانىسباي Balapan بالالار تەلەارناسى قىرعىز انيماتورلارىمەن بىرلەسىپ، عارىش سالاسى تۋرالى انيماتسيالىق جوبا تۇسىرىلىمىنە دايىندىق باستاعانىن اتاپ ءوتتى.
«قازىرگى ۋاقىتتا قازاقستان بۇل سالا بويىنشا ءبىرقاتار تابىستارعا قول جەتكىزدى، ونىمدەرىمىز سىرتقى نارىققا شىعارىلا باستادى. ەلدەگى بالالارعا ارنالعان جالعىز عانا Balapan تەلەارناسى انيماتسيا ءوندىرىسىنىڭ دامۋىنا ەرەكشە سەرپىن بەرىپ وتىر. جىلىنا 250-300 ءبولىمدى قۇرايتىن 20-25 انيماتسيالىق تۋىندى شىعارىپ وتىرمىز. تۇركىتىلدەس ەلدەردى ءبىرتۇتاس تۇركى تاريحىن كورسەتەتىن انيماتسيالىق جوبالار وندىرىسىنە اتسالىسۋعا شاقىرامىز»، - دەدى باسقارما ءتوراعاسى.
اۆتور: ايجان سەرىكجان قىزى