تۇركيانىڭ ت ر ت ارناسى نۇر- سۇلتان قالاسى تۋرالى باعدارلاما ازىرلەۋدە
ت ر ت مەن يۋنۋس ەمرس ينستيتۋتى اراسىندا قول قويىلعان ىنتىماقتاستىق اياسىندا ءتۇسىرىلىم توبى ءوز جۇمىستارىن باستاپ كەتتى. نۇر سۇلتان يۋنۋس ەمرە ينستيتۋتىنىڭ كۋرستارىندا تۇرىك ءتىلىن ۇيرەنىپ جاتقان وقۋشىلار ەلوردانى تۇركيالىق كورەرمەندەرگە تۇرىكشە تانىستىراتىن بولادى.
جالپى «قالاما قوش كەلدىڭىز» اتتى جوبا 13 بولىمنەن تۇرادى. بۇدان بۇرىن ەۆروپانىڭ ءىرى قالالارى لوندون، ريم، پاريج، امستەردام، بۋداپەشت، سونداي - اق موسكۆادا ءتۇسىرىلىم جۇمىستارى جۇرگىزىلدى. اتالعان باعدارلامانىڭ سەگىزىنشى ءبولىمى تولىقتاي نۇر سۇلتان قالاسىنا ارنالعان. يۋنۋس ەمرە ورتالىعىندا وقيتىن 2 قازاقستاندىق وقۋشى قالانىڭ كورىكتى جەرلەرىنە بارىپ قىسقاشا تاريحىن بايانداپ كورەرمەندەرگە تانىستىرادى.
ت ر ت توبى بايتەرەك مونۋمەنتى، بەيبىتشىلىك جانە كەلىسىم سارايى، حان شاتىر ويىن ساۋىق جانە ساۋدا ورتالىعى، قازاقستان ۇلتتىق مۋزەيى، قولجازبالار جانە سيرەك كىتاپتار ۇلتتىق ورتالىعى، ازىرەت سۇلتان مەشىتى، اتىراۋ كوپىرى، ەكسپو -2017 كەشەنى مەن قازاق ەلى مونۋمەنتى سياقتى ەلوردانىڭ ەڭ تانىمال ورىندارىن تۇسىرەدى.
قازاقتىڭ ۇلتتىق اسپاپتارى دومبىرا مەن ساز سىرناي تارتاتىن ونەرپازدار تۇرىك كورەرمەندەرگە ءوز ونەرلەرىن پاش ەتەدى. سونداي - اق جۇرگىزۋشىلەر قازاق ۇلتتىق تاعامدارىن ازىرلەيتىن ەلورداداعى رەستورانداردا تاعامداردىڭ ءدامىن تاتىپ، قازاق اسحاناسى تۋرالى تۇرىك كورەرمەنگە مالىمەتتەر ۇسىناتىن بولادى.
پروديۋسەر- رەجيسسەر پارلايان يىلدىز، وپەراتورلار ميەۆليۋت دونەر مەن سەلچۋك كاراچام دايىندايتىن باعدارلاما TRT ارنالارىندا كورەرمەندەرگە جول تارتادى.