ءماجىلىس دەپۋتاتى تەمەكى ونىمدەرى مەن الكوگول سۋسىندارىن تاڭبالاۋ جوباسىنا كۇمان كەلتىردى
«بيزنەستى اسىرەسە تەمەكى ونىمدەرىن، الكوگول سۋسىندارىن، ءسۇت ونىمدەرىن تاڭبالاۋ جونىندەگى ىلكى جوبا اشۋلاندىرىپ وتىر. ولار ەلەكتروندى ەسەپشوت جۇيەسىن قايتالايدى جانە تاۋارلاردىڭ تىكەلەي قىمباتتاۋىنا كاسىپكەرلەردىڭ قوسىمشا شىعىندانۋىنا الىپ كەلەدى. اتالعان ىلكى جوبالاردىڭ تيىمدىلىگى بۇگىنگە دەيىن دالەلدەنبەگەن. مۇنىڭ ءبارى بيزنەستىڭ جاعدايىن جەڭىلدەتپەيدى، كەرىسىنشە ناشارلاتادى. بيزنەس تە ادىستەردى قايتا قاراۋدى جانە بۇل ىلكى جوبالاردى الىپ تاستاۋدى ۇنەمى سۇراپ كەلەدى. وسى ىلكى جوبالاردىڭ بارلىعى دا قارجى مينيسترلىگىنىڭ دەربەس بۇيرىعىمەن ەنگىزىلەدى. مۇنداي جايت نەلىكتەن ورىن الۋدا؟ اتالعان ىلكى جوبالاردىڭ قاجەتتىلىگى بيزنەسپەن نەگە تالقىلانبايدى؟»، - دەدى بۇگىن ءماجىلىستىڭ جالپى وتىرىسىندا ق ر پرەمەر-ءمينيسترى اسقار مامينگە دەپۋتاتتىق ساۋال جولداعان امانجان جامالوۆ. وسىعان وراي ءماجىلىس دەپۋتاتى ۇكىمەت باسشىسىنان ىلكى جوبالاردىڭ جۇزەگە اسىرىلۋ بارىسى مەن تيىمدىلىگى تۋرالى تولىققاندى اقپارات بەرۋدى، جاڭا ىلكى جوبالاردى ەنگىزۋدى توقتاتۋدى سۇرايدى.