مينيستر قاڭتار-تامىز ارالىعىندا بيۋدجەتكە تۇسكەن كىرىستى ايتىپ بەردى
بۇل تۋرالى ۇكىمەت وتىرىسىندا ق ر قارجى ءمينيسترى ەرۇلان جاماۋبايەۆ ايتتى. ونىڭ ايتۋىنا قاراعاندا، تامىز ايىنىڭ سوڭىنداعى مالىمەت بويىنشا، مەملەكەتتىك بيۋدجەتكە 7 تريلليون 139 ميلليارد تەڭگە سوماسىندا كىرىس ءتۇسىپ، جوسپار %105,3- عا ورىندالعان. سونىڭ ىشىندە رەسپۋبليكالىق بيۋدجەتكە 4,6 تريلليون تەڭگە ءتۇسىپ، جوسپار %100,7 عا جۇزەگە اسىرىلعان. «كىرىستەر بويىنشا جوسپار 30 ميلليارد تەڭگەگە اسىرا ورىندالدى. ونىڭ ىشىندە سالىق جوسپارى 17 ميلليارد تەڭگەگە ارتىق ورىندالدى. سالىقتار بويىنشا اسىرا ورىنداۋدىڭ نەگىزگى سومالارى ىشكى ءوندىرىس تاۋارلارىنا سالىناتىن قوسىلعان قۇن سالىعىنا، پايدالى قازبالاردى وندىرۋگە سالىناتىن سالىققا، كورپوراتيۆتىك تابىس سالىعىنا تيەسىلى بولدى»، - دەدى مينيستر.
الايدا شيكى مۇنايعا سالىناتىڭ ەكسپورتتىق كەدەن باجى بويىنشا جوسپار ورىندالماعان.
«بۇل تەڭىز كەن ورنىندا كۇردەلى جوندەۋ جۇرگىزىلۋىنە جانە شيكى مۇناي ءوندىرۋ كولەمىنىڭ تومەندەۋىنە بايلانىستى بولدى. يمپورتقا قوسىلعان قۇن سالىعى بويىنشا جوسپاردىڭ ورىندالماۋى وتكەن جىلدىڭ 7-ايىمەن سالىستىرعاندا ءۇشىنشى ەلدەرمەن تاۋار اينالىمىنىڭ %6,7 ىنا نەمەسە 875 ميلليون دوللارعا، ونىڭ ىشىندە شىلدە ايىندا يمپورت كولەمىنىڭ %26 ىنا نەمەسە 645 ميلليون دوللارعا تومەندەۋىنە بايلانىستى بولدى»، - دەدى ۆەدومستۆو باسشىسى.
سونداي-اق، قارجى ءمينيسترى سالىقتىق ەمەس تۇسىمدەردىڭ قالاي وزگەرگەنىنە توقتالدى. ايتۋىنشا، مۇندا جوسپار اسىرا ورىندالعان. وعان نەگىزىنەن مەملەكەتتىك ورگاندار سالاتىن ايىپپۇلدار، ءوسىمپۇلدار، سانكسيالار جانە ءوندىرىپ الۋلار ەسەبىنەن سەبەپكەر بولعان.
«جەرگىلىكتى بيۋدجەتتەردىڭ كىرىستەرى %115 عا اتقارىلدى جانە 2 تريلليون 547 ميلليارد تەڭگەنى قۇرادى. جوسپار 332 ميلليارد تەڭگەگە، ونىڭ ىشىندە سالىقتار بويىنشا 280 ميلليارد تەڭگەگە اسىرا ورىندالدى. كىرىستەر بويىنشا جوسپارلار بارلىق وڭىرلەردە اسىرا ورىندالدى»، - دەدى ەرۇلان جاماۋبايەۆ.
اۆتور: ەسىمجان ناقتىباي