ۇلتتىق ەكونوميكا كورسەتكىشتەرى پاندەمياعا دەيىنگى دەڭگەيگە جەتتى - اسقار مامين

نۇر- سۇلتان. قازاقپارات – ق ر پرەمەر- ءمينيسترى اسقار مامين ۇكىمەت وتىرىسىندا جەرگىلىكتى اكىمدىكتەرگە ەكونوميكانىڭ بارلىق سەكتورىندا ءوسىم قارقىنىن ۇلعايتۋدى تاپسىردى، دەپ حابارلايدى قازاقپارات ءتىلشىسى.

«ۇلتتىق ەكونوميكا كورسەتكىشتەرى ورنىقتى قالپىنا كەلتىرۋ ديناميكاسىن كورسەتۋدى جالعاستىرىپ وتىر جانە پاندەميا باستالار الدىنداعى دەڭگەيىنە جەتتى. سەگىز ايدىڭ قورىتىندىسى بويىنشا جالپى ىشكى ءونىمنىڭ ءوسۋى 3 پايىزعا دەيىن جىلدامدادى. وڭدەۋشى ونەركاسىپتە ءوسۋ قارقىنى 5,8 پايىزعا، ساۋدا سالاسى 9,1 پايىزعا، بايلانىستا 12,8 پايىز جانە قۇرىلىستا 11,4 پايىزعا كۇشەيۋدە. 8-ايدا ەلىمىزدە 8,9 ميلليون شارشى مەتر ءۇي پايدالانۋعا بەرىلدى»، - دەدى ۇكىمەت باسشىسى. ونىڭ ايتۋىنشا، بۇل بىلتىرعى جىلمەن سالىستىرعاندا 10,5 پايىزعا ارتىق.

«قىزمەتتەر كورسەتۋ سەكتورىنداعى ءوسۋ قارقىنى قالپىنا كەلىپ، 2,3 پايىزعا جەتتى. نەگىزگى كاپيتالعا ينۆەستيتسيالار كورسەتكىشىنىڭ سەنىمدى قالىپقا كەلە باستاعانىن اتاپ ءوتۋ كەرەك، ولار تاۋ- كەن ءوندىرۋ ونەركاسىبىن ەسەپكە الماعاندا 18 پايىزعا ۇلعايدى»، - دەگەن پرەمەر- مينيستر ءار ءوڭىردىڭ 8 ايدا قول جەتكىزگەن ماكروەكونوميكالىق كورسەتكىشتەرىنە توقتالدى.

ايتۋىنشا، قاڭتار- تامىز ايلارىنىڭ قورىتىندىسى بويىنشا بارلىق نەگىزگى 7 ماكروكورسەتكىش بويىنشا الماتى، جامبىل، قوستاناي، ماڭعىستاۋ وبلىستارى مەن شىمكەنت قالاسىندا ءوسۋ بايقالىپ وتىر.

«نەگىزگى 6 كورسەتكىش بويىنشا سەگىز وڭىردە ءوسىم بايقالادى. بۇل اقمولا، اقتوبە، اتىراۋ، قاراعاندى، قىزىلوردا، پاۆلودار، سولتۇستىك قازاقستان وبلىستارى مەن نۇر- سۇلتان قالاسى. 5 كورسەتكىش بويىنشا وڭ سەرپىن ءۇش وڭىردە. بۇل - شىعىس قازاقستان، تۇركىستان وبلىستارى مەن الماتى قالاسى. ەڭ تومەنگى كورسەتكىش باتىس قازاقستان وبلىسىندا. ءوڭىر اكىمدىكتەرى ەكونوميكانىڭ بارلىق سەكتورلارىندا ءوسىم قارقىنىن ۇلعايتقانى ءجون»، - دەدى اسقار مامين.