دانيار ەلەۋسىنوۆتىڭ چەمپيوندىق كەزدەسۋگە قاشان شىعاتىنى انىقتالدى
بۇل تۋرالى Vesti.kz تىلشىسىنە بوكسشىنىڭ مەنەدجەرى زيا اليەۆ ايتىپ بەردى.
30 جاستاعى ەلەۋسىنوۆ ءوزىنىڭ سوڭعى كەزدەسۋىن وتكەن جىلى وتكىزىپ، الەمنىڭ بۇرىنعى چەمپيونى دجۋليۋس يندونگونى (23-4، 12 ك و) جەڭدى. ەندى ول كەلەسى كەزدەسۋىن قازان ايىندا وتكىزۋى مۇمكىن.
«تاعى ءبىر-ەكى رەيتينگتىك كەزدەسۋ كەرەك. سودان سوڭ دانيار الەم چەمپيونى بەلبەۋلەرىنىڭ بىرەۋىنە مىندەتتى قارسىلاس بولادى. ءبىراق ول كەزدە تانىمالدىلىق تا ۇلكەن ءرول وينايدى. ويتكەنى كوپتەگەن الەم چەمپيوندارى تاۋەكەلگە بارعىسى كەلمەيدى. ءيا، ەگەر سەن رەيتينگتە جوعارى تۇرساڭ، ولار كەزدەسۋگە مىندەتتى. ال جالپى چەمپيوندىق كەزدەسۋگە شىعۋ ءۇشىن تانىمال دا بولۋ قاجەت. مىسالى، ەررول سپەنس (27-0، 21 ك و) ەلەۋسىنوۆكە قاراعاندا جوعالتاتىنى كوپ. سوندىقتان ول ايقاسقا كەلىسپەۋى ىقتيمال.
تەرەنس كروۋفورد (37-0، 28 ك و) تا ءدال سولاي باس تارتا سالادى. ولار الەم چەمپيونى دەگەن اتاعىنان بولەك، الەمدە وتە تانىمال. ءبىراق مىندەتتى قارسىلاس دەگەن اتاققا قول جەتكىزسەك، ۇيىمدار ارقىلى كەزدەسۋ ۇيىمداستىرۋعا بولادى»، - دەدى اليەۆ.
ەسكە سالايىق، قازان ايىنداعى كەزدەسۋدەن بولەك، دانيار قازاقستاندا دا جەكپە-جەك وتكىزۋى ىقتيمال.