مىرزاعالي ايتجانوۆ: باس باپكەر قىزمەتىنەن كەتۋگە ماجبۇرلەگەن ادامدار بولدى

نۇر-سۇلتان. قازاقپارات - قازاقستاننىڭ ەڭبەك سىڭىرگەن جاتتىقتىرۋشىسى مىرزاعالي ايتجانوۆ ۇلتتىق قۇرامانىڭ باس باپكەرى قىزمەتىنەن كەتۋگە ءماجبۇر بولعانىن مالىمدەدى.

ول توكيو وليمپياداسىنان قازاق بوكسشىلارىنىڭ التىنسىز قايتقانىنا قاتىستى پىكىر ءبىلدىردى.

مىرزاعالي ايتجانوۆ امان تاسىعاننىڭ TalkLike جوباسىنا سۇحبات بەردى، دەپ حابارلايدى Stan.kz.

«جاسىراتىن ەشتەڭەسى جوق، ونى وزىمىزبەن الىپ كەتپەيمىز. جازۋعا ماجبۇرلەگەن ادامدار بولدى. ماجبۇرلەپ، مەنى قيناعان جوق. مەن جۇمىسىمدى باستاعاننان باستاپ، قارسى بولعان ادامدار بولدى. ولارعا «بارىپ كەل، شاۋىپ كەلدەر» كەرەك بولعان شىعار؟! ءبىراق مەن جۇمىسىمدى دۇرىس، جاقسى باعىتتا باستادىم دەپ ويلايمىن. قاسىمدا مىقتى ماماندار بولدى. وزىمنەن ۇلكەن، تاجىريبەسى بار»، - دەدى ايتجانوۆ.

مىرزاعالي قۇلان ۇلى 2009-جىلى قازاقستاننىڭ الەمدىك رەيتينگتە 17-22- ورىندا تۇرعانىن، ال 2010-جىلدان باستاپ ەل بوكسىنىڭ وركەندەي باستاعانىن اتاپ ءوتتى.

«2010-جىلى ازيا بىرىنشىلىگىندە 5 مەدال جەڭىپ الدىق: 2 التىن، 2 كۇمىس، 1 قولا. ماقتانعانىم ەمەس، بوكستىڭ اتاسى اعىلشىندار بولىپ سانالادى. انگليا، كۋبا، رەسەي، ۋكراينا، وزبەكستان، باسقا دا شەتەلدىكتەر ءبارى بىزبەن ساناساتىن بولدى»، - دەپ اعىنان جارىلدى ول.

مىرزعالي ايتجانوۆ 2018-جىلى قازاقستان بوكس قۇراماسىنىڭ باس باپكەرلىگى قىزمەتىنەن كەتتى. ءوز ەركىمەن باس تارتقانىمەن، جاتتىقتىرۋشىعا قىسىم كورسەتكەندەر تابىلىپتى.

9 جىل قارسى تاراپپەن ارپالىسىپ كەلگەن ول اقىرىندا ورنىن بوساتۋ تۋرالى شەشىم قابىلداعان.

«كەيبىر كىسىلەر «ۇزاق ىستەپ جاتسىڭ، باسقالار دا ىستەسىن» دەگەندەي بولدى. مەن «وندا الىپ تاستاڭىزدار» دەيمىن. «الا المايمىز» دەدى. «نەگە؟» دەسەم، «نە ءۇشىن الارىمىزدى بىلمەيمىز»، - دەيدى. تەك قانا جاڭاعىداي قايتا-قايتا ايتا بەرگەننەن كەيىن، 9 جىل شىداۋ مۇمكىن ەمەس. ولارمەن ءيت سياقتى ىرىلداسىپ جۇرگەنشە، ورىن كەرەك بولسا دەپ 2018-جىلدىڭ جەلتوقسانىندا ۇيدەن جازىپ، جىبەردىم. ولار اڭ-تاڭ بولعان شىعار. مەن دە ميىمدى تىنىقتىرايىن دەدىم»، - دەيدى ايتجانوۆ.

ايتجانوۆ «پاريجدە وتەتىن كەلەسى وليمپيادا ويىندارىنا دەيىن قىزمەتكە قايتا كەلۋ تۋرالى ۇسىنىس تۇسسە، قابىلدايسىز با؟» دەگەن ساۋالعا جاۋاپ بەردى.

«مەن بۇعان قۇمار ەمەسپىن. كوپ ادامعا مەنىڭ جۇمىسىم ۇناماۋى مۇمكىن. مەن ءبىرىنشى كەزەكتە، ءتارتىپتى وزىمنەن باستايمىن. بىزدە قىلتىڭ-سىلتىڭ دەگەن جوق. اسكەري ءتارتىپ. سول سەبەپتەن دە مەنىڭ كەلۋىم كوپ ادامعا كەرەك ەمەس شىعار؟! ناقتى ۇلكەن باسشىلاردان ۇسىنىس تۇسسە، سولارعا عانا ايتا الامىن بۇل نارسەنى»، - دەدى ول.

سونداي-اق ايتجانوۆ توكيودان التىنسىز قايتۋ وزىنە دە وڭاي سوقپاعانىن جەتكىزدى.

«التىن الامىز دەپ بارىپ قولا العانىمىزعا ءوزىم دە قۋانىپ تۇرعان جوقپىن. ساكەندى جۇباتتىم، ءبىراق كوزىمنەن جاس شىعىپ كەتتى.

سوزبەن ايتۋ، سىناۋ وڭاي. ىشىندە ءجۇرىپ، ءبارىن كورىپ، ءبىز ۇندەمەي وتىرمىز. سىرتتان ايتاتىندارعا تاڭعالامىن»، - دەدى ايتجانوۆ.