كانەلونىڭ جەكە باپكەرى قازاقستاندىق نوكاۋتشىنى الەم چەمپيونى ەتپەك

نۇر-سۇلتان. قازاقپارات - قازاقستاندىق بوكسشى يۆان دىچكو (10-0، 10 ك و) مەكسيكالىق ساۋل «كانەلو» الۆارەستىڭ (56-1-2، 38 ك و) جەكە باپكەرى ەندي رينوسومەن جاتتىعا باستاۋى مۇمكىن.

ءمان-جايدى Vesti.kz تىلشىسىنە وليمپيادا جۇلدەگەرىنىڭ مەنەدجەرى زيا اليەۆ ايتىپ بەردى.

31 جاستاعى يۆان سان-ديەگوداعى رەينوسونىڭ زالىندا جاتتىعادى. ەندى باپكەر بىرگە جۇمىس ىستەپ كورۋدى ۇسىنىپتى.

«بۇعان دەيىن دە، 2019-جىلى جاتتىقتىرعىسى كەلەتىنىن ايتقان. وسى تۋرالى قوڭىراۋ شالعان ەدى. ال ەندى سپاررينگتەردىڭ ەكىنشى كۇنى-اق ول اۋىر سالماقتا چەمپيون بولاتىنىن بايقاپ، ءوزى جاتتىقتىرۋعا ىنتالى ەكەنىن مالىمدەدى. يۆاننىڭ جانىنا بارىپ: «مەن سەنى الەم چەمپيونى ەتەمىن، بىرگە جاتتىعايىق» دەگەنى بار.

قازىر وسىنى تالقىلاپ جاتىرمىز. لاگەردى كوشىرۋ كەرەك دەگەندەي، ىسكە اسىرۋ جولدارىن قاراستىرىپ جاتىرمىز. رەينوسو سياقتى مامان دىچكوعا پايدالى دۇنيەلەر ۇيرەتە الادى دەگەن ويدامىن»، - دەيدى اليەۆ.