پەتروپاۆلدا جولدان ءوتىپ بارا جاتقان اناسى مەن قىزىن كولىك قاعىپ كەتتى

پەتروپاۆل. قازاقپارات - پەتروپاۆلدا كولىك جۇرگىزۋشىسى جۇرگىنشىلەر وتكەلىنەن ءوتىپ بارا جاتقان اناسى مەن قىزىن ابايسىزدا قاعىپ كەتتى، دەپ حابارلايدى قازاقپارات ءتىلشىسى.

وقىس وقيعا جايىندا الەۋمەتتىك جەلىدە جاريا بولدى.

پەتروپاۆل قالالىق پوليتسيا باسقارماسىنىڭ مالىمەتىنشە، جول-كولىك وقيعاسى بۇگىن ساعات 14:00 شاماسىندا بولعان.

ءۋاليحانوۆ كوشەسىندەگى جۇرگىنشىلەر وتكەلى ارقىلى جولدى كەسىپ ءوتىپ بارا جاتقان ەكى ادامدى Audi 100 اۆتوكولىگىنىڭ 52 جاستاعى جۇرگىزۋشىسى قاعىپ كەتكەن. وقيعا كۋاگەرلەرى بىردەن جەدەل جاردەم قىزمەتىن شاقىردى.

زارداپ شەككەندەر 32 جاستاعى ايەل مەن ونىڭ 8 جاسار قىزى. ولارعا ەمدەۋ مەكەمەسىندە مەديتسينالىق كومەك كورسەتىلىپ، كەيىن ۇيلەرىنە جىبەرىلدى. جول-كولىك وقيعاسىنا بايلانىستى اكىمشىلىك ماتەريال جينالىپ، اكىمشىلىك پوليتسيا بولىمىنە پروتسەسسۋالدىق شەشىم قابىلداۋ ءۇشىن بەرىلدى.