اقمولا وبلىسىندا قازا تاپقان ءتارتىپ ساقشىسى تۋرالى فيلم ءتۇسىرىلدى

None
None
كوكشەتاۋ. قازاقپارات - كونستيتۋتسيا كۇنى قارساڭىندا سەلينوگراد اۋداندىق پوليتسيا بولىمىندە قازا تاپقان ءتارتىپ ساقشىسى جەڭىس كۇپتەنوۆ تۋرالى فيلمنىڭ تۇساۋكەسەرى ءوتتى، دەپ حابارلايدى قازاقپارات ءتىلشىسى.

اۋماقتىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، قازاقستان رەسپۋبليكاسىنىڭ كونستيتۋتسيا كۇنى قارساڭىندا سەلينوگراد اۋداندىق پوليتسيا بولىمىندە قازا تاپقان قىزمەتكەر جەڭىس كۇپتەنوۆ تۋرالى «تۇنگى وقيعا ىزىمەن» دەرەكتى فيلمىنىڭ تۇساۋكەسەرى ءوتتى.

«پوليتسيا لەيتەنانتى 2007-جىلى قوعامدىق ءتارتىپ، ازاماتتاردىڭ تىنىشتىعى مەن بەيبىتشىلىگىن قورعاۋ جولىندا قىزمەتتىك بورىشىن ورىنداۋ كەزىندە قازا تاپتى. جەكە اۆتوكولىگىمەن ۇيىنە قايتىپ كەلە جاتقان ول اقمول اۋىلىنداعى ايالدامادا اراق ءىشىپ العان ءبىر توپ جاستاردى سابىرعا شاقىرماقشى بولادى. الايدا، جاستار ونىڭ سوزىنە قۇلاق اسپاي، كەرىسىنشە وزىنە جابىلا كەتەدى. ارتىنشا، قوعامدىق ءتارتىپتى بۇزۋشىلار قاشىپ كەتەدى. ال، پوليتسيا لەيتەنانتى بولسا اۋرۋحاناعا جەتكىزىلگەن. دارىگەرلەر اجالدان اراشالاپ قالا المادى. اۋىر جاراقات سالدارىنان ول كوز جۇمدى. ونىڭ ارتىندا جۇكتى ايەلى مەن كىشكەنتاي قىزى قالدى»، - دەدى ۆەدومستۆونىڭ باسپا ءسوز حاتشىسى اسەم ابدىكارىموۆا.

فيلم اۋداندىق ءبولىمنىڭ جەكە قۇرامىنا كورسەتىلدى. قويىلىمدا باستى ءرولدى سەلينوگراد پوليتسيا ءبولىمىنىڭ قىزمەتكەرى اعا سەرجانت ايان نۇرمانوۆ وينادى. سونىمەن بىرگە، وسى فيلمنىڭ باستى كەيىپكەرى جەڭىستىڭ تۋىستارى مەن جاقىندارى كوردى.

«جەڭىس جانعابىل ۇلى وتە ۇقىپتى جانە جۇمىسىنا ادال جان ەدى. ونىڭ كريمينالدىق پوليتسيا بولىمشەسىندە جۇمىس ىستەۋدى ارمانداعانى ءالى ەسىمدە»، - دەپ ەسكە الادى كادر ساياساتى توبىنىڭ ينسپەكتورى پوليتسيا مايورى ريزا كۇرجىبايەۆا.

سەلينوگراد اۋداندىق پوليتسيا ءبولىمىنىڭ باستىعى قانات بيتاقوۆ قازا تاپقان ارىپتەسىنىڭ اناسىنا، جۇبايىنا جانە قىزىنا گۇل شوقتارىن، ال ۇلى نۇرجەڭىسكە كارتينا تابىس ەتتى. ءوز كەزەگىندە مارقۇمنىڭ اناسى باعىم مەن جۇبايى نۇرگۇل وتباسىنا كورسەتكەن قۇرمەتى مەن قامقورلىعى ءۇشىن پوليتسيا قىزمەتكەرلەرىنە العىس ايتتى.

شارا بارىسىندا ىشكى ىستەر ورگاندارىندا قىزمەتىن باستاعان جاس قىزمەتكەرلەر سالتاناتتى تۇردە انت قابىلدادى.

سوڭعى جاڭالىقتار