پرەزيدەنت پۋسان قالاسىندا قازاقستاننىڭ باس كونسۋلدىعىن اشۋ تۋرالى جارلىققا قول قويدى

نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ پۋسان قالاسىندا (كورەيا رەسپۋبليكاسى) قازاقستان رەسپۋبليكاسىنىڭ باس كونسۋلدىعىن اشۋ تۋرالى جارلىققا قول قويدى، دەپ حابارلايدى قازاقپارات اقورداعا سىلتەمە جاساپ.

«پۋسان قالاسىندا (كورەيا رەسپۋبليكاسى) قازاقستان رەسپۋبليكاسىنىڭ باس كونسۋلدىعى اشىلسىن. قازاقستان رەسپۋبليكاسىنىڭ ۇكىمەتى وسى جارلىقتان تۋىندايتىن قاجەتتى شارالاردى قابىلداسىن»، دەلىنگەن قۇجاتتا.

ەسكە سالا كەتسەك، مەملەكەت باسشىسى كورەياعا ساپارى كەزىندە پۋساندا قازاقستاننىڭ باس كونسۋلدىعىن اشۋ تۋرالى شەشىم قابىلداعانىن جەتكىزگەن ەدى. قازاقستان پرەزيدەنتى قاسىم-جومارت توقايەۆ كورەيا رەسپۋبليكاسىنا 16-تامىزدا مەملەكەتتىك ساپارمەن باردى. قاسىم-جومارت توقايەۆ سول ەلدىڭ پرەزيدەنتى مۋن جە ينمەن كەلىسسوز جۇرگىزدى. كەيىن ەكى ەلدىڭ پرەزيدەنتتەرى ب ا ق وكىلدەرى ءۇشىن بريفينگ وتكىزدى.

«قازاقستان كورەيامەن سەرىكتەستىكتى جان- جاقتى دامىتۋعا باسا ءمان بەرەدى. ءبىز ءوزارا ءتيىمدى ارىپتەستىكتى جوعارى باعالايمىز»، - دەدى قاسىم-جومارت توقايەۆ. ق ر پرەزيدەنتى وڭتۇستىك كورەيانىڭ ءىرى كومپانيالارىنىڭ باسشىلارىمەن - «Samsung Electronics» كومپانياسىنىڭ پرەزيدەنتى ين ەنگ لي جانە «Doosan Heavy Industries جانە Construction» پرەزيدەنتى ەنگ ينگ چونگپەن ەكىجاقتى كەزدەسۋلەر وتكىزدى. سونداي-اق، مەملەكەت باسشىسى سەۋلداعى كيبەر ۋنيۆەرسيتەتتىڭ اۋماعىندا ورناتىلعان ۇلى اقىن اباي بيۋستىنىڭ اشىلۋ راسىمىنە قاتىستى.