توقايەۆتىڭ سەۋلدەگى اباي ءمۇسىنىنىڭ اشىلۋىندا سويلەگەن ءسوزى جاريالاندى

نۇر-سۇلتان. قازاقپارات – ق ر پرەزيدەنتى قاسىم-جومارت توقايەۆتىڭ كورەياعا مەملەكەتتىك ساپارى اياسىندا سەۋلدەگى اباي ءمۇسىنىنىڭ اشىلۋىندا سويلەگەن ءسوزى جاريالاندى، دەپ حابارلايدى قازاقپارات ءتىلشىسى.

مەملەكەت باسشىسى قاسىم-جومارت توقايەۆتىڭ كورەيا رەسپۋبليكاسىنا جاساعان مەملەكەتتىك ساپارى اياسىندا قازاق ويشىلى اباي قۇنانباي ۇلىنىڭ ءمۇسىنى اشىلعان بولاتىن. سەۋلدە ورناتىلعان ءبيۋستىڭ اشىلۋ سالتاناتى بەينەلەنگەن ۆيدەونى پرەزيدەنتتىڭ باسپا ءسوز حاتشىسى بەرىك ءۋالي Facebook - تەگى پاراقشاسىندا جاريالادى.

جوباسى قازاقستاندا دايىندالىپ، سۇلباسى كورەيادا قولادان قۇيىلعان ءمۇسىننىڭ اشىلۋىندا قاسىم-جومارت توقايەۆ قازاق ويشىلىنا ارنالعان ەسكەرتكىشتىڭ ۋنيۆەرسيتەت اۋماعىنا ورناتىلۋىنىڭ ماڭىزدى ەكەنىنە توقتالدى.

«اباي جۇرتتى عىلىم يگەرۋگە، ءبىلىمدار بولۋعا ۇندەدى، جاڭاشىلدىق پەن جاسامپازدىقتى دارىپتەدى. اباي مۇراسى - ءبىزدىڭ ەلىمىزگە عانا ەمەس، بارشا ادامزاتقا ورتاق قۇندىلىق. اباي شىعارمالارى الەمنىڭ ءبىرقاتار تىلىنە اۋدارىلدى. سونىڭ ىشىندە كورەي تىلىندە «التىن شاڭىراقتا شىرقالعان ءان» اتتى كىتابى جارىققا شىقتى. كورەيادا ۇلى ويشىلعا ارنالعان ماركالار ازىرلەندى. مۇنىڭ ءبارى ەكى ەلدىڭ رۋحاني ىنتىماقتاستىعىن ودان ءارى نىعايتا تۇسەرى انىق»، - دەگەن مەملەكەت باسشىسى ەكىجاقتى قارىم-قاتىناسىمىزدىڭ تامىرى تەرەڭدە جاتقانىن اتاپ ءوتتى.

«كەزىندە تۋعان ەلىنەن امالسىز اجىراعان مىڭداعان كارىس ازاماتى قازاقتىڭ جەرىنەن پانا تاپتى. بۇگىندە ولار قازاقستاندى وتانىم دەپ سانايدى. كارىس باۋىرلارىمىز ەگەمەن ەلىمىزدى وركەندەتۋگە بارىنشا ۇلەس قوسىپ كەلە جاتىر. سونىمەن بىرگە ولار ەكى مەملەكەتتىڭ اراسىندا دانەكەر بولۋدا. بيىل قازاقستاننىڭ تاۋەلسىزدىگىنە 30 جىل تولادى. وسى كەزەڭدە ەلدەرىمىز سەنىمدى سەرىكتەسكە اينالدى. 2010 -جىل قازاقستاننىڭ كورەياداعى جىلى دەپ جاريالاندى. 2011 -جىلى كورەيانىڭ قازاقستانداعى جىلى دەپ اتالدى. سول ارقىلى ءبىز بارلىق باعىتتاعى بايلانىستارىمىزدى دامىتتىق. اسىرەسە مادەني- رۋحاني سالاداعى ىنتىماعىمىزدى نىعايتتىق»، - دەدى پرەزيدەنت.

سالتاناتتى شارادا سويلەگەن ءسوزىنىڭ سوڭىندا قاسىم- جومارت توقايەۆ قازاق ويشىلىنىڭ ءمۇسىنىن كورەيا استاناسىندا ورناتۋعا اتسالىسقان ادامداردىڭ بارىنە العىس ايتتى.

«وسىنداي تىعىز قارىم-قاتىناس بولاشاقتا دا جالعاسىن تابادى. قازاقستاننىڭ جەتەكشى وقۋ ورنىندا كورەي ءتىلى وقىتىلىپ كەلەدى. كورەيالىق ستۋدەنتتەر دە قازاق ءتىلىن وقىپ جۇرگەنىن جاقسى بىلەمىز. بۇل، ارينە، كوڭىل قۋانتارلىق ەرەكشە جاعداي. كوپتەگەن قازاق جاستارى كورەي ۋينۆەرسيتەتتەرىندە ءبىلىم الۋدا. ءبىز ءبىلىم، عىلىم جانە مادەنيەت سالاسىنداعى ىنتىماقتاستىقتى ودان ءارى جالعاستىرا بەرەمىز. بۇل ءوزارا بايلانىستى كەلەشەكتە دە دوستىق رۋحىندا دامىتا تۇسۋگە جول اشادى. بارشاڭىزدى كورەيا استاناسىندا اباي ەسكەرتكىشىنىڭ اشىلۋىمەن قۇتتىقتايمىن. بۇل - ەكى ەل ءۇشىن دە ايتۋلى تاريحي وقيعا. وسى ماڭىزدى شاراعا اتسالىسقان ازاماتتارعا شىنايى ريزاشىلىعىمدى بىلدىرەمىن. اباي مۇراسى كورەيا حالقىنىڭ رۋحاني الەمىنەن ءوز ورنىن تاباتىنىنا كامىل سەنەمىن»، - دەپ تۇيىندەدى قازاقستان باسشىسى.