ق ر پرەزيدەنتى كورەيانىڭ ۇلتتىق باتىرى حون بوم دونىڭ قۇرمەتىنە وراي وتكەن راسىمگە قاتىستى - فوتو

نۇر-سۇلتان. قازاقپارات - قازاقستان پرەزيدەنتى كورەيانىڭ ۇلتتىق باتىرى حون بوم دونىڭ قۇرمەتىنە وراي وتكەن راسىمگە قاتىستى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

مەملەكەت باسشىسى سالتاناتتى جيىنداعى سوزىندە، «بۇل - قازاقستاننىڭ كورەي جۇرتىنا دەگەن شىنايى ىقىلاسى مەن زور قۇرمەتىنىڭ بەلگىسى» دەپ اتاپ ءوتتى.

- مۇنداي ءىس-شارالاردىڭ تاريحي ءمان- ماڭىزى ايرىقشا. قازاقتار دا، كورەيلەر دە تاۋەلسىزدىكتىڭ قادىر-قاسيەتىن جاقسى تۇسىنەدى. حون بوم دو - كورەيانىڭ ازاتتىعى ءۇشىن كۇرەسكەن بىرەگەي تۇلعا. ناعىز باتىر، شىنايى وتانسۇيگىش. گەنەرال تاعدىردىڭ جازۋىمەن ءومىرىنىڭ سوڭعى جىلدارىن قازاق جەرىندە وتكىزدى. سودان بەرى قانشا جىل وتسە دە اتاجۇرتىندا باتىردىڭ ەرلىگى ۇمىتىلعان جوق. ونى ءبىزدىڭ حالقىمىز دا جاقسى بىلەدى. قىزىلوردا قالاسىندا حون بوم دونىڭ قۇرمەتىنە مەموريال تۇرعىزىلعان. 2018 -جىلى باتىردىڭ تۋعانىنا 150 جىل تولدى. قازاقستان حالقى اسسامبلەياسى وسىعان وراي ارنايى كونفەرەنسيا وتكىزدى. گەنەرالدىڭ ەسىمى قازاق ەلىنىڭ جادىندا ساقتالادى. ونىڭ مەموريالى مەملەكەت قامقورلىعىندا بولادى، - دەدى قازاقستان پرەزيدەنتى.

قاسىم-جومارت توقايەۆ كەزىندە كورەي ۇلتىنىڭ كوپتەگەن وكىلى قازاقستانعا ەرىكسىز قونىس اۋدارعانىن، ولاردىڭ اراسىندا گە بون ۋ، ساي دەن حاك، كيم مان سام سياقتى تانىمال تۇلعالار بارىن اتاپ ءوتتى.

- جەر اۋدارىلعان كورەيلەردى حالقىمىز باۋىرىنا باسىپ، پانالاتتى. ولار قازاق ەلىندە ءوسىپ- ءونىپ، ناعىز وتانداستارىمىزعا اينالدى. ءبىزدىڭ ەلدە ءار ەتنوستىڭ ءوز تامىرىنان اجىراماي، ءتىلى مەن ءدىلىن ساقتاۋىنا بارلىق جاعداي جاسالعان. كورەي دياسپوراسى دا وسى يگىلىكتى كورىپ وتىر. ەلىمىزدە قازاقستان كورەيلەرىنىڭ قاۋىمداستىعى بار. كورەي مادەني ورتالىقتارى مەن كورەي تەاترى جۇمىس ىستەيدى.

سونداي-اق، كورەي تىلىندە گازەت شىعادى. كورەي باۋىرلارىمىز كوپتەگەن سالادا تابىستى ەڭبەك ەتۋدە. ولاردىڭ ەل ەكونوميكاسىن وركەندەتۋگە قوسىپ جاتقان ۇلەسى زور. قازاقستاندا تۇراتىن كورەيلەر ەكى ەلدىڭ قارىم-قاتىناسىن دامىتۋعا دا بەلسەندى اتسالىسىپ ءجۇر.

ءبىزدىڭ ىنتىماقتاستىعىمىز بولاشاقتا وسىنداي دوستىق رۋحتا نىعايا بەرەدى دەپ سەنەمىن، - دەدى قاسىم-جومارت توقايەۆ.

قاسىم-جومارت توقايەۆ كورەيا رەسپۋبليكاسىنىڭ پرەزيدەنتى مۋن جە ينگە كورەي حالقىنىڭ ۇلتتىق باتىرى حون بوم دونىڭ قابىرىنەن الىنعان توپىراقتى تابىستادى. كورەيا رەسپۋبليكاسىنىڭ پرەزيدەنتى مۋن جە ين قاسىم-جومارت توقايەۆقا زور ريزاشىلىعىن ءبىلدىرىپ، ۇلت باتىرى حون بوم دوعا ەڭ جوعارى مەملەكەتتىك ناگرادا بەرىلگەنىن حابارلادى.