رۋحيا بايدۇكەنوۆا: حالىقتى ونەرىممەن دە، كومەگىممەن قۋانتقىم كەلەدى - انشىمەن سۇحبات

None
None
نۇر-سۇلتان. قازاقپارات - 2021 -جىل قازاقستان مۋزىكانتتارى مەن ساز سۇيەر قاۋىم ءۇشىن جاعىمدى جاڭالىقتارعا تولىپ بولىپ تۇر.

يمانبەكتىڭ گرەمميدى يەلەنۋى ەلدى ءدۇر سىلكىنتكەن بولاتىن. ال، جۋىقتا عانا رۋحيا بايدۇكەنوۆا «سلاۆيان بازارى» بايقاۋىنان جەڭىسپەن ورالدى. پاندەميادان قاجىعان حالىقتىڭ رۋحىن جارقىن جەڭىسىمەن كوتەرىپ، كوڭىلىن مارقايتقان رۋحيا بايدۇكەنوۆا «قازاقپارات قوناعى» جوباسىندا بۇگىن سىر شەرتەدى.

- رۋحيا، قوش كەلدىڭىز! ءسىزدى تاعى دا جەڭىسىڭىزبەن قۇتتىقتايمىز! وسى كۇندەر ارالىعىندا جەڭىس پەن قوشەمەتتىڭ ەيفورياسىنا بوي ۇرەتىپ تە قالعان شىعارسىز. «سلاۆيان بازارىنىڭ» جەڭىمپازى بولۋ ءومىرىڭىزدى وزگەرتە باستادى دەپ ايتۋعا بولا ما؟

- قۇتتىقتاۋىڭىزعا راحمەت! «سلاۆيان بازارىنان» كەيىن ءومىرىم وزگەردى دەۋگە بولادى. سەبەبى، بوس ۋاقىت جوق. كۇنىنە 2-3 ساعات قانا ۇيىقتاپ ءجۇرمىن. كوپتەگەن، كونسەرتتەرگە، سۇحباتتار مەن جوبالارعا قاتىسۋ تۋرالى ۇسىنىستار ءتۇسىپ جاتىر. بارىنشا بارىنە ۇلگەرۋگە تىرىسىپ ءجۇرمىن. جالپى ءومىرىم وزگەردى دەۋگە بولادى. ءبىراق مەن ءوزىم وزگەرگەن جوقپىن دەپ ويلايمىن.

- ءسىزدىڭ جەڭىسىڭىزگە قۋانعان جۇرتتى اراسىندا پرەزيدەنت تە بولدى. ءتىپتى تىلەگىن ءبىلدىرىپ، قۇتتىقتادى. قالاي قابىلدادىڭىز؟

- پرەزيدەنت قۇتتىقتايدى دەپ كۇتپەگەن ەدىم. مەملەكەت باسشىسىنىڭ ءبىز سياقتى تالانتتى جاستاردى كورىپ، قولداپ جاتقانىنا وتە قۋانىشتىمىن، راحمەت ايتامىن. بولاشاقتا ءبىزدىڭ ەلدە ءتۇرلى سالالاردان ۇزدىكتەر شىعىپ، الەمگە تانىلادى دەپ ويلايمىن. ءبارىن قولداسا ەكەن دەگەن ءۇمىت، سەنىم بار.

- بايقاۋعا قاتىساتىن كەزدە كىم سىزگە ەرەكشە قولداۋ ءبىلدىردى؟

- ەرەكشە قولداۋ كورسەتكەن، بارلىق جەردە ايتىپ جۇرگەنىمدەي، ديماش قۇدايبەرگەن. جالپى ول كىسى تەك وسى بايقاۋ كەزىندە عانا ەمەس، ومىرىمدە دە قولداۋ كورسەتىپ جۇرگەن ادامداردىڭ ءبىرى. ول كىسى مەنى بالا كەزدەن تانيدى. الەم ءارتىسى بولسا دا، سول قالپىندا، سول قارىم- قاتىناستا قالعان جانداردىڭ ءبىرى. مەنىڭ ديماش سياقتى ادامنىڭ كوزىنە ءتۇسۋىم ۇلكەن ءبىر دارەجە دەپ ويلايمىن. بۇل دا اللانىڭ ماعان بەرگەن ءبىر سىيى شىعار.


- ۆيتەبسك حالقىنىڭ ەرەكشە قولداۋىن سەزىندىم دەپ ايتىپسىز. جالپى كونكۋرس كەزىندە ۆيتەبسك جۇرتىنىڭ ىقىلاسى قالاي بولدى؟

- ءبىرىنشى كەلگەن كۇننەن باستاپ ماعان بەلارۋس ەلىنىڭ حالقى وتە قاتتى ۇنادى. ءبىزدىڭ قازاققا ۇقسايدى - قوناقجاي، كۇلىپ قارسى الادى. ەشقانداي ۇرىس-كەرىسسىز، ءوز-وزدەرىمەن... تاعى ءبىر بايقاعانىم ۇلتقا بولىنبەيدى ەكەن. مىسالى، مەن قازاق بولسام دا، كادىمگىدەي كومەكتەسىپ، ساحناعا شىققانشا قولداپ، سەنىم ءبىلدىردى. ءتىپتى كەيبىر كورەرمەندەر وسىندا قالساڭشى دەپ جاتتى.

- ءوزىڭىز الەمدىك دەڭگەيدەگى ءانشى دەپ وتىرعان ديماش قۇدايبەرگەن وسى بايقاۋدىڭ 2015 -جىلعى جەڭىمپازى عوي. ونىڭ قازىلار القاسىندا بولاتىنىن قاشان ەستىدىڭىز؟ العاش ەستىگەندە «ونەرىم ءادىل باعالاناتىن بولدى» دەپ قۋاندىڭىز با، الدە «جەرلەسىمدى جەرگە قاراتپاۋىم كەرەك» دەگەن قوبالجۋ باسىم بولدى ما؟

- ديماش قازىلار القاسىندا بولادى دەگەندى ەستىگەندە مەن وتە قاتتى قورىقتىم دەسەم دۇرىس بولاتىن شىعار. سەبەبى الەمدىك دەڭگەيدەگى ءارتىس قوي. جالپى مەن ول كىسىنىڭ الدىندا ءان ايتۋعا ۇيالاتىنمىن. قاتتى ۇيالاتىنمىن. باسقا ادامداردان ۇيالمايمىن، ءبىراق ديماشتان ۇيالاتىنمىن. وسى بايقاۋ كەزىندە وسى ۇيالۋ سەزىمىن پسيحولوگيالىق تۇرعىدا جەڭدىم. ۆيتەبسككە تەك ءوزىم ءۇشىن عانا بارا جاتپاعانىمدى ءبىلدىم. ءبىر جاعىنان قازاقستاننىڭ ابىرويى بار، ەكىنشى جاعىنان ديماش قۇدايبەرگەن قازىلار القاسىنىڭ مۇشەسى بولعاندىقتان، ول دا ۇلكەن جاۋاپكەرشىلىك ارتتى. ويتكەنى ديماش كوتەرىپ كەتكەن بيىكتىكتى الاسارتپاۋىمىز كەرەك. قازاقستاننان بارعان ۇمىتكەر جامان ايتپاۋى كەرەك دەگەن ماقسات قويدىم. سول ماقساتقا جەتتىم.

- دەگەنمەن ديماشتىڭ رۋحاني قولداۋىن سەزىنگەنىڭىزدى ايتتىڭىز عوي. العاشقى بولىپ قۇتتىقتاعانداردىڭ ءبىرى دە ديماش ەكەن.

- ءيا. دايىندىق بارىسىندا ول كىسى ماعان ۆوكالدىق جاعىنان دا كومەكتەستى. ونىسىنا كوپ راحمەت. 4-5 رەت بىرگە دايىندالدىق، اقىلىن ايتتى. ال ءدال بايقاۋ كەزىندە ارالاسقان جوقپىز دەۋگە بولادى. ءبىراق مەن ءان ايتقان كەزدە كادىمگىدەي ۋايىمداعانىن سەزدىم.

- ءسىزدىڭ اندەرىڭىزدى تىڭداپ وتىرىپ جوعارعى نوتالاردى الۋىڭىزدى، ءان ىرعاعىڭىزدى ديماشتىڭ ستيلىنە ۇقساتتىم. بۇل ءجاي ۇقساستىق پا، الدە ديماشتان ۇلگى الاسىز با؟

- نەگىزى ول نوتالاردى بالا كەزدەن ايتىپ كەلەمىن. ءبىراق تەحنيكالىق، ۆوكالدىق جاعىنان ديماشتان، مارايا كەريدەن جانە باسقا دا شەتەلدىك انشىلەردەن ۇلگى الدىم. ءار تالانتتى انشىدەن وزىمىزگە كەرەگىن، وزىمىزگە جاعاتىن دۇنيەلەردى الىپ وتىرامىز. ياعني، ءبىلىم جيناپ وتىرامىز.


- بالا كەزدەن دەمەكشى، مۋزىكا الەمىنە قالاي كەلدىڭىز؟ ءان ايتۋ وتباسىڭىزدا كىمنەن دارىعان؟

- مەنىڭ بايدۇكەن اتام دومبىراشى، كۇيشى بولعان. قازىر ومىردە جوق. ءارتىس بولعانىمدى سول كىسى قالاعان ەكەن. مەن ەكىدە بولعان كەزدە دۇنيەدەن ءوتىپتى. ءوز اناسىنىڭ قۇرمەتىنە مەنىڭ اتىمدى رۋحيا دەپ قويعان. سول رۋحيا اجەم دە ءان ايتقان ەكەن. جالپى ونەر تۋرالى تۇسىنىگى بار، جاقسى- جاماندى ايىرا الاتىن وتباسىدان شىققانمىن.

- وسى سۇحبات الدىندا «حفاكتور» جوباسىنا قاتىسقان ساتتەرىڭىزدى قاراپ كوردىم. سول كەزدە اتا-اناڭىز ءانشى بولعانىمدى قالامادى دەپسىز؟ دارىگەر بولعانىڭىزدى قالاپتى. قازىر اتا-اناڭىزدىڭ ويى وزگەردى مە؟ ونەرىڭىزگە دەگەن كوزقاراستارى قانداي؟

- «سلاۆيان بازارىنا» دەيىن اتا-انام مەنىڭ ونەرىمە قاتتى قىزىقپايتىن. اسىرەسە كارانتين بولعان كەزدە ايتاتىن، «كوردىڭ بە، دارىگەردىڭ وقۋىن وقۋ كەرەك ەدى. قازىر ەلگە سول كەرەك. ال قازىر ءانشى بولىپ ۇيدە بوسقا وتىرسىڭ» دەيتىن. اسىرەسە اكەم دارىگەر دەگەن حالىققا پايداڭ تيەتىن ماماندىق قوي دەپ ايتاتىن. ءبىراق «سلاۆيان بازارىنا» وتەردىڭ الدىندا اكەم باتاسىن بەردى. «تەك قانا تازا جولمەن، تازا ەڭبەكپەن، ابىرويمەن جۇرسەڭ بولدى» دەدى. بىلاي ايتقاندا، قازىر اتا-انام وتە قۋانىشتى.

- بايقاۋدان كەيىن بۇكىل اقپارات قۇرالدارى ءسىزدىڭ جەڭىسىڭىز تۋرالى جازىپ، سۇحبات الىپ، باعدارلامالارعا قاتىستىرىپ جاتىر. سونى كورىپ اتا-اناڭىز ماقتانىپ جۇرگەن شىعار. ولاردىڭ ومىرىنە ءسىزدىڭ جەڭىسىڭىز قانداي وزگەرىس اكەلدى؟

- ءبىر بىلەتىنىم، مەنىڭ كوزىمشە ماقتامايدى. ءبىراق انام تەلەفونمەن سويلەسىپ جاتقاندا «وسىنىڭ بارىنە ءوز ەڭبەگىمەن جەتتى عوي» دەگەندەرىن ەستىپ قالامىن. جالپى اتا-انام قاتتى ماقتاعاندى ۇناتپايدى. مەن سوندايمىن. بىرەۋ ماقتاپ جاتسا، ءبىر ءتۇرلى ىڭعايسىزدانىپ وتىرامىن.

- كارانتين تۋرالى ايتىپ قالدىڭىز عوي. سىزگە سول ۇزىلىستەر پايدالى بولدى ما؟

- وتە پايدالى بولدى.

- قاي تۇرعىدان؟

- پسيحولوگيا جاعىنان كوپ نارسەنى ۇقتىم. كوپ دۇنيەنى زەرتتەدىم دەۋگە بولادى. كوپ سالانى وقىپ- ءبىلىپ، ومىرىمە قاجەتتى ءبىلىم جينادىم. كينوكونسەرت، ءاندى ارلەۋ، «پليۋس جازۋ» سياقتى جۇمىستاردى سمارتفون كومەگىمەن ىستەۋدى مەڭگەردىم. سونداي-اق، كارانتين كەزىندە وزىمە رەجيم ورناتتىم. ياعني تاڭعى ساعات بەستە تۇرىپ، تۇنگى ساعات 11-دە ۇيىقتاپ قالىپ ءجۇردىم. تاماقتى دا ۋاقىتىمەن ءىشىپ، سالاۋاتتى ءومىر سالتىن ۇستانا باستادىم. ال وعان دەيىن تۇنگى ساعات ۇشتە ۇيىقتاپ كۇندىز توعىزدا، وندا تۇراتىن ەدىم.

- «سلاۆيان بازارىنا» دايىندالۋ ءۇشىن قانشا ۋاقىت جۇمسادىڭىز؟ كارانتين كەزىندە باستادىڭىز با دەگەنىم عوي.

- نەگىزى مەن ءۇش جىل قاتارىنان «سلاۆيان بازارىنىڭ» ىرىكتەۋىنە قاتىسىپپىن. بيىلعى ءۇشىنشىسى جوسپارىمدا بولماعان. باسقا بايقاۋلاردى ىزدەپ جۇرگەن ەدىم. ءبىراق ماڭدايىما وسىلاي جازىلىپتى. تاعى دا قاتىسىپ كورسەڭشى دەگەندەر بولدى. «نەگە كورمەسكە» دەگەن ويمەن ءوتىنىم جىبەرە سالعان بولاتىنمىن. ءوتىپ كەتتىم. ياعني، مەنىڭ تۇسىنگەنىم، ءبىز ادامدار ءوز ءومىرىمىزدى ءوزىمىز قيىنداتادى ەكەنبىز. جەڭىل قابىلداساق، كوپ نارسە جەڭىل كەلەدى.

- «سلاۆيان بازارىنا» دەيىن «حفاكتور»، «توپجارعان» سياقتى تەلەۆيزيالىق جوبالارعا قاتىسقان ەكەنسىز. بۇل جوبالار سىزگە نە بەردى؟ بايقاۋلاردا قانداي ناتيجەگە جەتتىڭىز؟


- «حفاكتور» تۋرالى ايتساق، مەنىڭ ۇيالاتىن قويىلىمدارىمنىڭ ءبىرى ول. سەبەبى سىرتقى كەلبەت جاعىنان دا، ۆوكال جاعىنان دا كەمشىلىكتەر بولدى. ستۋدياداعى قازىلاردىڭ ءسوزى بىزگە ەستىلمەيتىن. سويلەگەن ءسوزىمنىڭ ءوزى گرامماتيكالىق جاعىنان دۇرىس شىقپاي جاتتى. ول كەزدە بالامىن عوي ەندى. سول جوباداعى ءوزىمدى كورىپ، كەيىن ماقسات قويدىم. قاي جەردە ونەر كورسەتسەم دە، قازىلاردىڭ سوزىنە اسا ءمان بەرىپ، قانداي دەڭگەيدەگى دىبىس بولسا دا، انىق ەستۋ كەرەك دەگەن ساباق الدىم. سول بايقاۋدان كەيىن سىرتقى كەلبەتكە ءمان بەرىپ، سول جاعىنان جۇمىس ىستەي باستادىم.

- ال «توپجارعان» بايقاۋى شە؟

- «توپجارعان» مەن ءۇشىن ءبىر جاقسى جوبا بولدى. ول جەردە «سەن ءوتۋ كەرەك ەدىڭ»، «سەن جەڭۋ كەرەك ەدىڭ» دەپ وكىنىش بىلدىرگەندەر دە بولدى. مەن ەشكىمگە رەنجىمەيمىن. قايتا راحمەت ايتامىن. سەبەبى ADAM Media سياقتى كومپانيامەن جۇمىس ىستەدىم. بىلايشا ايتقاندا، دينارا ادام سىندى ەلىمىزدەگى ۇزدىك پروديۋسەردىڭ جوباسىنا قاتىستىم. بۇل ماماننىڭ قولعا العان جوبالارى ءارقاشان رەيتينگتىڭ باسىندا تۇرادى. مەنىڭشە، بۇل دا ماعان اللانىڭ بەرگەن مۇمكىندىگى بولعان سياقتى. سول كوماندامەن جۇمىس ىستەۋدىڭ ءساتى ءتۇستى. دينارا اباي قىزىنىڭ كومانداسى ەرەكشە. ءوزى دە وتە جاقسى ادام. ومىردە اپكە مەن سىڭلىدەي بولىپ، ارالاسىپ كەتتىك. ءبىراز ۋاقىتتان كەيىن ADAM Media تۇسىرگەن «ەگىز لەبىز» جوباسىندا ەكى ايداي مۋزىكالىق رەداكتور بولىپ جۇمىس ىستەدىم. شىنى كەرەك، ماعان بۇل ۇلكەن تاجىريبە بولدى. قاراپ وتىرسام، اللا تاعالا مەنى بۇل جولعى «سلاۆيان بازارىنا» ءتۇرلى مۇمكىندىكتەر بەرۋ ارقىلى شىڭداعان سياقتى. وسىدان كەيىن «باسى قاتتى بولسا، اياعى ءتاتتى بولادى» دەگەنگە سەنەتىن بولدىم.

- ءسىزدى ءبىز 5 وكتاۆادا ايتاتىن ءانشى دەپ جازىپ ءجۇرمىز، ايتىپ ءجۇرمىز. بۇل كەز كەلگەن ءانشىنىڭ قولىنان كەلە بەرمەيتىن دۇنيە. داۋسىڭىزدى قالاي كۇتەسىز؟ قانداي جاتتىعۋلار ورىندايسىز؟ مۋزىكاعا جاڭادان قادام باسقان انشىلەرگە كەڭەسىڭىز بولسىن.

- ارينە، ول سۋىق ىشپەۋ، اياقتان سۋىق وتكىزبەۋ، جىلى كيىنۋ. ەڭ باستىسى - دەنساۋلىق. دەنساۋلىق بولماسا، ءان ايتۋ قيىنداۋ. جەيتىن تاماققا دا ءمان بەرۋ كەرەك. اسقازان ارقىلى ءبىزدىڭ دىبىس تالشىقتارىمىز جۇمىس ىستەيدى. ياعني، اسقازان قىجىلىنان ساقتانۋ كەرەك. ول داۋىس تەمبرىنە اسەر ەتەدى. كۇندەلىكتى مۇرىن جانە باس رەزوناتورىنا ارنالعان جاتتىعۋلاردىڭ ماڭىزى زور. ەڭ پايدالى جاتتىعۋلار تىنىس الۋ جولدارىنا ارنالعان. تىنىس دۇرىس بولماسا، داۋىستىڭ شىعۋى وتە قيىن.

- ءسىز 22 جاسىڭىزدا تالايدىڭ قولى جەتپەگەن بيىكتى باعىندىردىڭىز دەۋگە بولاتىن شىعار. ۇستاز اتانىپ، شاكىرت تاربيەلەپ ءجۇر ەكەنسىز. ءبىر شاكىرتىڭىزدى حالىقارالىق بايقاۋعا دايىنداپ جاتىرمىن دەپ ايتقان ەدىڭىز. مۇنداي جاۋاپكەرشىلىكتى الۋعا قورىقپادىڭىز با؟ شاكىرتتەرىڭىزدىڭ قانداي جەڭىسىمەن ماقتانا الاسىز؟

- جالپى ماعان كەلەتىن شاكىرتتەر وتە تالانتتى. مەن قازاقستاننىڭ ەستراداسى بيىك دەڭگەيگە جەتەتىنىنە شىنىمەن دە سەنەمىن. سەبەبى ماعان كەلەتىن جاس بۋىن وتە- وتە تالانتتى. ولارمەن جۇمىس ىستەۋ وزىمە دە ەرەكشە اسەر ەتەدى. ويتكەنى جاڭا ادام كەلەدى. ونىڭ پسيحولوگياسىن زەرتتەيمىز. ءارتىستىڭ ومىرىنە وسىنىڭ ءبارى اسەر ەتەدى. جاڭادان ءبىر باعىتتاعى اندەردى تىڭدايمىز. مەن دايىنداعان ءسانيا جانە كاميلا دەگەن ەكى قىز «بالالار ەۆروۆيدەنيەسىنە» قاتىستى. كاميلا ءۇشىنشى ورىن، ءسانيا جەتىنشى ورىن الدى. ودان كەيىن تاعى دا شەتەلدىك ونلاين بايقاۋلارعا قاتىسىپ ءجۇردى. جاس بۋىنمەن دايىندالۋ وتە كەرەمەت.

- نەسىمەن كەرەمەت؟

- ول ماعان دا تاجىريبە. جاستاردان وزىمە قوسىمشا ءبىلىم الام دەۋگە دە بولادى. بالا بولسا دا، تالعامى بيىك دۇنيەلەر كورسەتەتىندەرى بار. بالانىڭ جانى تازا بولادى عوي. سوندىقتان جاقسى ەنەرگەتيكا بولادى. مۋزىكا ءۇشىن ەنەرگەتيكا ماڭىزدى. سەبەبى كورەرمەن ونى قاتتى سەزەدى.

- نەلىكتەن پروديۋسەرمەن جۇمىس ىستەگىڭىز كەلمەيدى؟ العا قويعان قانداي جوسپارلارىڭىز قانداي؟

- قازىر كاسىبي، جان-جاقتى جۇمىس ىستەيتىن جاقسى كومانداڭ بولسا، جۇمىس جۇرەدى. ءسال بۇرىنىراق پروديۋسەرلەردىڭ زامانى بولعان سياقتى. مەنىڭشە، قازىر ونداي زامان ەمەس.

- ءسىزدى اۋەجايدان كۇتىپ العان كەزدە ۇستازىڭىز رۋحياعا ەندى جاقسى ءبىر ءان جازدىرىپ، بەينەبايان ءتۇسىرۋ كەرەك دەگەن ەدى... وسى جاعىنان قانداي جوسپارىڭىز بار؟

- قازىر مەن اندەر جازىپ ءجۇرمىن. ءبىراق قاي انگە بەينەكليپ تۇسىرەتىنىمىز ازىرگە بەلگىسىز. تاڭداۋ ءجۇرىپ جاتىر. كوپتەگەن اۆتورلارمەن جۇمىس ىستەپ ءجۇرمىز. ۇسىنىستار دا ءتۇسىپ جاتىر. جاقىن ارادا كليپ شىعۋى مۇمكىن. ءبىراق مەن اسىقپايمىن. سەبەبى اسىعىپ ءجۇرىپ كوڭىلدەن شىقپايتىن ءان جازعىم كەلمەيدى.

- مۋزىكاداعى ستيلىڭىزدى تاڭداپ بولدىڭىز با؟ مەن تىڭداعان اندەردىڭ كوبى پاتريوتتىق تاقىرىپتاعى جانە حالىق اندەرى بولدى. قانداي باعىت ۇستاناسىز؟

- باعىتىم ءالى قالىپتاسقان جوق. سوندىقتان ءتۇرلى باعىتتارعا بارىپ ءجۇرمىن. ونى مەن مويىندايمىن. بالكىم 1-2 جىلدا ءوز-ءوزىمدى تاباتىن شىعارمىن. ازىرگە بارلىق ستيلدى زەرتتەپ كورۋگە تىرىسامىن.

- ءسىزدىڭ مۋزىكاداعى ەلەۋلى جەتىستىگىڭىزدىڭ سلاۆيان بازارىنان باستالعانىن ىرىمداپ، ديماشتىڭ ءىزباسارى دەپ اتاپ جۇرگەندەر بار. ءوزىڭىز دە بىرنەشە رەت بۇدان كەيىن تەلەۆيزيالىق جوبالارعا قاتىسامىن دەپ ايتتىڭىز. ناقتى ءبىر جوبالار بويىنشا جۇمىس ىستەپ جاتىرسىز با؟

- قازىر ىزدەنىستەمىز دەسەم دۇرىس شىعار. 1-2 جوبا تاپتىق. قازىر سونى پىسىقتاپ جاتىرمىز.

- شەتەلدىك پە، الدە وتاندىق پا؟

- شەتەلدىك؟

- نەگە شەتەلدىك؟

- سەبەبى، قازاقستاندا جوبالار وتە از. شىنى كەرەك، وسى ۋاقىتقا دەيىن ءانشى بولىپ جۇرسەم دە، مەنى حالىق كوپ تاني بەرمەيتىن. مۋزىكالىق ورتا عانا بىلەتىن. نەگىزى اندەر شىعارىپ، ەفيرلەرگە شىعىپ ءجۇردىم. مەنى ەفيردەن كەسىپ تاستاۋ دەيتىن بولعان جوق. ءبىراق جالپى كوپشىلىك «سلاۆيان بازارىنان» كەيىن تاني باستادى. شەتەلدىك جوبا ارقىلى ءوز قابىلەتىڭدى دالەلدەۋ وڭاي دەۋگە بولاتىن شىعار.

- كۋميرىڭىز بار ما، كىممەن ءبىر ساحنادا ءان ايتقىڭىز كەلەدى؟

- مارايا كەريمەن، ديماشپەن ءان ايتقىم كەلەدى. ءبىراق ديماشتىڭ ءوزى ونى بىلمەيدى. نەگە ەكەنىن بىلمەيمىن، بەتىنە ايتا المايمىن. سۇحباتتاردا عانا ايتىپ ءجۇرمىن.

- نەگە وسى ەكى ادام؟

- سەبەبى مارايا كەري - مەنىڭ كۋميرىم. ديماش تا كۋميرىم. ول كىسى ەلىكتەۋگە تۇرارلىق تۇلعا. قاراپايىمدىق، ءبارى بار. ال مارايا كەريمەن كوبى مەنىڭ داۋسىمدى ۇقساتىپ جاتادى. مايكل دجەكسەن ءتىرى بولعاندا ونىمەن دە ايتار ەدىم.

- رۋحيا بايدۇكەنوۆانىڭ پلەيليستىندە قانداي اندەر بار؟

- ءار ءتۇرلى اندەر بار. ءبىراق ونىڭ كوبى حالىق تىڭداي بەرمەيتىن سيمفونيالىق شىعارمالار. YouTube كانالداردا ءار ءتۇرلى جوبالار بار. سولاردان جاڭا باعىتتاعى اندەردى تىڭدايمىن. جاڭا شىعىپ جاتقان اندەردى تىڭداۋعا تىرىسامىن جالپى. ياعني نوستالگيامەن تىڭدايتىن ءان مەنىڭ تىزىمىمدە قازىر جوق دەۋگە بولادى. سەبەبى جاڭا باعىتتاردى باعىپ وتىرۋعا تىرىسامىن.

- ءسىزدى كىم نەمەسە نە شابىتتاندىرادى؟

- مەنى كىشكەنتاي بالالار شابىتتاندىرادى. بالانى قاتتى جاقسى كورەمىن. ءوزىمنىڭ دە بالام بولعانىن قالايمىن. كوپ بالالى بولعىم كەلەدى. سپوتشىلاردان دا شابىت الامىن.

- سپورتشىلاردان قالاي شابىت الاسىز؟

- سپورتشىلار - وتە تارتىپكە ۇيرەنگەن ادامدار. جاۋاپكەرشىلىكتەرى جوعارى، رۋحى مىقتى بولىپ كەلەدى. مىسالى، مەن بوكستان الەم چەميپونى فەرۋزا شاريپوۆامەن جاقسى ارالاسامىن. ومىردە كادىمگىدەي تۋىسقانداي ارالاسامىز. بالا كەزدەن سپورتتى قىزىقتايمىن. دەنيس تەندى كوپ قارايتىنمىن. ونەر ادامدارى مەن سپورتشىلاردىڭ اراسىندا ءجىپسىز بايلانىس بار سياقتى. ۇقساستىق كوپ. سپورتتا دا، مۋزىكادا دا جەتىستىك جاتتىعۋلار ارقىلى كەلەدى. ولار دەنەسىن شىنىقتىرسا، ءبىز داۋىسىمىزدى كۇتىپ، باپتايمىز دەگەن سياقتى.

- سپورت جايلى ايتقان سوڭ سۇراماي كەتۋ ابەستىك شىعار. قازىر ءبىزدىڭ سپورتشىلار توكيو وليمپياداسىندا ونەر كورسەتىپ جاتىر. ءوز اتىڭىزدان قانداي لەبىز، تىلەك ايتار ەدىڭىز؟

- توكيوداعى وليمپيادا ويىندارىندا ەلىمىزدىڭ كوك بايراعى تەك بيىكتەن كورىنسىن. التىن، كۇمىس، قولا جۇلدەلەر كوپ بولسىن. ەڭ باستىسى، جەڭسە دە، جەڭىلسە دە ەڭسەلەرى تۇسپەسىن دەگىم كەلەدى. مىسالى ءزۇلفيا چينشالوعا قاتتى ريزا بولدىم. قيىندىقتارعا مويىماي، قايتادان وليمپياداعا بارىپ، جۇلدەمەن ورالىپ جاتىر. بارشا سپورتشىلارعا ساتتىلىك تىلەيمىن.

- اۋەلى ديماش، دانەليا، ەرجان ماكسيم، يمانبەك، نازيما، ينديرا ەدىلبايەۆا، ەندى ءسىز. قازاقستان اتىنان سىنعا تۇسەتىن مۋزىكانتتارعا كورەرمەن تارابىنان قويىلاتىن تالاپتى بىرنەشە ساتىعا كوتەرىپ تاستادىڭىزدار. وسى تۇرعىدا جاس تالانت يەلەرىنە ايتار تىلەگىڭىز، لەبىزىڭىز، كەڭەسىڭىز قانداي؟

- ءارقاشان تەك ءوز ويلارىڭىزبەن ءومىر سۇرىڭىزدەر. ءوز دەگەندەرىڭىزگە جەتىڭىزدەر. ءبىر اللا مەن ارماندارىڭىزعا سەنسەڭىزدەر، ەشكىم سىزدەرگە كەدەرگى بولا المايدى. ارمانداڭىزدار، ەڭبەكتەنىڭىزدەر، سەنىمدى بولىڭىزدار.

- ال رۋحانيانىڭ ءوز ارمانى قانداي؟

- ءدال قازىر مەنىڭ ارمانىم - قاراپايىم حالىققا كومەكتەسۋ. ونەرىممەن قوسا قايىرىمدىلىق قور اشقىم كەلەدى. ول ازىرشە ارمان عانا. ءدال قازىر قولىمنان كەلە قويماس. نەگىزى بولاشاقتا حالىققا كومەكتەسەتىن سونداي قور اشقىم كەلەدى. وسى جەڭىستى دە مەن ءوزىم ءۇشىن اكەلگەن جوقپىن دەي الامىن. بىلتىر «سلاۆيان بازارىنا» سەن ءوتۋ كەرەك ەدىڭ» دەگەن سوزدەر ايتىلدى. بىلتىر بارماعانىما قۋانامىن. سەبەبى جەڭۋىم ەكىتالاي ەدى. ءتىپتى جەڭگەن كۇننىڭ وزىندە حالىق قينالىپ جاتقاندا مەنىڭ قۋانىشىما بىرگە شاتتانا الار ما ەدى؟.. بالا كەزدەن مەنىڭ جەڭىسىمە حالىق قۋانسا ەكەن دەپ ارماندايتىنمىن. سول ارمانعا جەتكىزگەن حالىققا راحمەت.

- ال ءبىز سىرلى سۇحباتىڭىزعا راحمەت ايتامىز.

اۆتور: ەسىمجان ناقتىباي

سوڭعى جاڭالىقتار