تانىمال كينورەجيسسەر ەدۆارد قۇلبايەۆ ومىردەن ءوتتى

نۇر- سۇلتان. قازاقپارات - قازاقستان كينەماتوگرافيستەر وداعىنىڭ مۇشەسى، ادەبيەتشى، كينورەجيسسەر ەدۆارد ايتقازى ۇلى قۇلبايەۆ ومىردەن ءوتتى.

«تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ۇجىمى ادەبيەتشى، كينورەجيسسەر، سسەناريست، ۇستاز، قازاقستان كينەماتوگرافيستەر وداعىنىڭ مۇشەسى - ەدۆارد ايتقازى ۇلى قۇلبايەۆتىڭ ومىردەن وتۋىنە بايلانىستى وتباسى مەن تۋعاندارىنا قايعىرىپ كوڭىل ايتادى»، - دەلىنگەن تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ پاراقشاسىندا. ەدۆارد ايتقازى ۇلى 1959 - جىلى شىعىس قازاقستان وبلىسى زاۆودينكا اۋىلىندا دۇنيەگە كەلگەن. كيروۆ اتىنداعى قازمۋ بيولوگيا فاكۋلتەتىن ءبىتىرىپ، ك س رو مەملەكەتتىك كينو جانىنداعى سسەناريستەر مەن رەجيسسەرلەردى دايارلايتىن جوعارى كۋرستى اياقتاعان.

ەدۆارد ايتقازى ۇلىنىڭ اڭگىمەلەرى مەن شىعارمالارى «جالىن» باسپاسىنان شىعاتىن «يۋنوست»، «پروستور» جۋرنالدارىندا جاريالانىپ تۇرعان. رەجيسسەر جانە سسەناريست رەتىندە «جەل مەن تۇز» (1989)، «ايتىس» (1990)، «بەلارۋس شەبى» (ۇوس- داعى بەلورۋسسيانى ازات ەتكەن قازاقستاندىق جاۋىنگەرلەر تۋرالى، 2010)، «ۆاسيليي سمىسلوۆ»، «ۇيلەسىمدىلىك ىزدەۋدە» (2012) سىندى دەرەكتى فيلمدەردىڭ اۆتورى.