تالدىقورعان اكىمىنىڭ ورىنباسارى جۇمىستان قۋىلدى
بۇل جايىندا سىبايلاس جەمقورلىققا قارسى قىزمەتتىڭ الماتى وبلىستىق دەپارتامەنتى رەسمي مالىمەت تاراتتى. قازىر اتالمىش دەپارتامەنتتىڭ تەرگەۋ باسقارماسى تالدىقورعان قالاسى كاسىپكەرلىك ءبولىمىنىڭ باسشىسىنا جانە باس مامانىنا قاتىستى ءىستى تەرگەپ جاتىر.
ولار ق ر قىلمىستىق كودەكسىنىڭ 366-بابى بويىنشا پارا الدى دەگەن كۇدىككە ىلىنگەن. ايتا كەتەيىك، اتالعان ءبولىمنىڭ باستىعى قاراماعىنداعى باس مامانمەن سىبايلاسىپ، كوروناۆيرۋسقا قاتىستى شەكتەۋ شارالارى كەزىندە بۇقارالىق ءىس-شارالاردى وتكىزۋگە تىيىم سالىنعانىنا قاراماستان مەيرامحانا يەلەرىنەن جانە كوشەدەگى ساۋدا- ساتتىق نۇكتەلەرىنەن 20 مىڭنان باستاپ 270 مىڭ تەڭگەگە دەيىن پارا الىپ وتىرعان.
ولاردان بولەك تاعى 5 مەيرامحانانىڭ اكىمشىسى دە پارا بەرگەنى ءۇشىن قىلمىستىق جاۋاپكەرشىلىككە تارتىلىپ وتىر. وسى قىلمىستىق ءىستىڭ نەگىزىندە الماتى وبلىستىق سىبايلاس جەمقورلىققا قارسى ءىس- قيمىل دەپارتامەنتىنىڭ باسشىلىعى قالا اكىمىنىڭ قاتىسۋىمەن كەڭەس وتكىزدى.
ونىڭ ناتيجەسى بويىنشا ءتيىستى باقىلاۋ جاساماعانى ءۇشىن تالدىقورعان قالاسى اكىمىنىڭ ورىنباسارى ساۋلە ارزانبەكوۆا جۇمىستان شىعارىلدى.
«اتالعان جەمقورلىق قىلمىسىن تەرگەۋ جالعاسىپ جاتىر. باسقا مالىمەتتەر تەرگەۋ مۇددەسىنە بايلانىستى جاريالانبايدى» دەپ ءمالىم ەتتى دەپارتامەنت.