ۆاكسينانىڭ جاناما اسەرىنە شالدىعۋ نايزاعاي ءتۇسۋ ىقتيمالدىعىمەن بىردەي - الماز شارمان

نۇر- سۇلتان. قازاقپارات - پروفيلاكتيكالىق مەديتسينا اكادەمياسىنىڭ پرەزيدەنتى، امەريكا دەنساۋلىق ساقتاۋ قاۋىمداستىعىنىڭ مۇشەسى الماز شارمان ۆاكتسيناتسيادان كەيىنگى جاناما اسەرلەردەن قورقۋ نايزاعايدان قورقىپ، جاۋىندى كۇنى كوشەگە شىقپاۋمەن بىردەي ارەكەت دەگەن وي ايتتى، دەپ حابارلايدى قازاقپارات ءتىلشىسى.

«كوروناۆيرۋس بۇگىندە الدىن الۋعا بولاتىن اۋرۋ. ۆاكسينا 100 پايىز بولماسا دا، كوروناۆيرۋس ينفەكسياسىنان، سىرقاتتىڭ اۋىر وتۋىنەن قورعايدى. بۇگىندە الەمدە ءتۇرلى ۆاكسينالاردىڭ 4 ميلليارد دوزاسى ەگىلدى. ارينە، ۆاكسينانىڭ ءوزى ۆيرۋس تۋدىرمايدى جانە ۆاكسينا العاندار ءىس جۇزىندە كوۆيدتەن ولمەيدى. ۆاكسينانى 100 پايىز قاۋىپسىز دەپ تە ايتا المايمىز. وتە سيرەك جاعدايلاردا ولار اللەرگيالىق رەاكسيا نەمەسە قاننىڭ ۇيۋى سياقتى جاناما اسەرلەردى تۋدىرۋى مۇمكىن. مۇنداي رەاكسيالار ۆاكتسينا العان 50 مىڭ ادامنىڭ بىرەۋىندە عانا كەزدەسەدى. بۇل ىقتيمالدىلىقتى نايزاعاي ءتۇسۋى ىقتيمالدىعىمەن سالىستىرۋعا بولادى. بۇل وتە سيرەك كەزدەسەدى»، - دەپ ءتۇسىندىردى ساراپشى.

سونىمەن قاتار، ول ۆاكسينا الماعان ءار بەسىنشى ادام قان ۇيۋ قاۋپىنە شالدىعاتىنىن ايتتى.

«بۇل قاۋىپتىڭ ىقتيمالدىعى ۆاكسينا العاننان كەيىنگى ىقتيمالدىقتان مىڭ ەسە جوعارى. ۆاكسينالار جاڭا تۋعان نارەستەلەردە رەپرودۋكتيۆتىك اۋىتقۋلار مەن دەفورماتسيالاردىڭ دامۋىنا اكەلمەيدى. كەرىسىنشە، كوۆيدپەن اۋىراتىندار بەدەۋلىكتىڭ، شالا تۋىلۋدىڭ، سونداي- اق ميدىڭ، جۇرەكتىڭ، باسقا ورگانداردىڭ سوزىلمالى سىرقاتىنىڭ، ونىڭ ىشىندە اقىل- وي قابىلەتىنىڭ تومەندەۋىنىڭ ۇلكەن قاۋپىنە ۇشىرايدى»، - دەدى الماز شارمان.