قازاقستان فەرمەرلەرى جىلقى مەن قوي باسىن ساقتاندىراتىن بولدى

None
None
نۇر- سۇلتان. قازاقپارات - ساقتاندىرۋ شىعىندارى مەملەكەت ەسەبىنەن سۋبسيديالاناتىن تۇلىكتىڭ قاتارىن قوي مەن جىلقى تولىقتىراتىن بولدى.

بۇعان دەيىن تەك ءمۇيىزدى ءىرى قارا باسىن ساقتاندىرۋ شىعىندارىنا بيۋدجەتتەن سۋبسيديا تولەنەتىن، دەپ حابارلايدى قازاقپارات ءتىلشىسى.

«نارىققا ۇساق مال مەن جىلقى باسىن تولىق ساقتاندىرۋدى قامتاماسىز ەتەتىن جاڭا ونىمدەر ەنگىزىلدى. وعان بارلىق ىقتيمال تاۋەكەلدەر كىرەدى جانە ساقتاندىرۋدىڭ قۇنى سالىستىرمالى تۇردە تومەن»، - دەپ جازىلعان اۋىل شارۋاشىلىعى مينيسترلىگى باسپا ءسوز قىزمەتىنىڭ مالىمەتىندە.

مۇنداعى «تاۋەكەلدەردىڭ ءبارى دەپ وتىرعانى»- ىندەت، ءورت، جازاتايىم وقيعا سياقتى ادام ەركىنەن تىس بولاتىن توسىن جايتتار. سونداي- اق، ۇرى سويىپ اكەتكەنى دالەلدەنسە دە، ءىز- ءتۇزسىز جوعالىپ كەتسە ساقتاندىرۋ ارقىلى شىعىندى وتەپ الۋ تەتىگى ۇسىنىلادى.

«بۇرىنعى ءتاسىل بويىنشا فەرمەر مالىن ءوز شارۋاشىلىعىنىڭ اۋماعىندا عانا ءتۇرلى تاۋەكەلدەردەن ساقتاندىرا الاتىن. ال ۇسىنىلىپ وتىرعان جۇيە بويىنشا ساقتاندىرۋ اۋقىمى 5 شاقىرىم راديۋستاعى اۋماققا تۇگەل جۇرەدى»، - دەلىنگەن رەسمي مالىمەتتە.

مۇنداعى باستى تالاپتىڭ ءبىرى - ساقتاندىرىلاتىن مالدىڭ سانى 30 دان كەم بولماۋى كەرەك. ساقتاندىرۋعا جاتاتىن تۇلىك سانى كوبەيگەن سايىن تاريف تە وزگەرىپ وتىرادى. مىسالى جىلقىعا %2,31 - 6,46 ارالىعىندا، ۇساق مالعا %2,38 - 6,16 ارالىعىندا تاريف ۇسىنىلادى. ەڭ باستىسى، مال باسىن ساقتاندىرۋعا تولەنگەن قاراجاتتىڭ تەڭ جارتىسىن مەملەكەت سۋبسيديالايدى. ياعني، ساقتاندىرۋ شارتىن جاساسقان كەزدە فەرمەر شارتتاعى باعانىڭ جارتىسىن عانا تولەيدى. قالعان بولىگىن اۋىل شارۋاشىلىعىن قارجىلاي قولداۋ قورى بولەدى»- دەيدى قوردىڭ باسقارۋشى ديرەكتورى اسقار قاليەۆ.

مال باسىن ساقتاندىرۋ نارىعىن الاياقتاردان تازا ۇستاۋ ءۇشىن بۇل ىسكە قارجى نارىعىن رەتتەۋ جانە دامىتۋ جونىندەگى اگەنتتىگى بەرگەن ليتسەنزياسى بار كومپانيالاردىڭ عانا جۇمىس ىستەۋىنە رۇقسات ەتىلىپ وتىر.

ساقتاندىرۋمەن بايلانىستى قۇجاتتار مەن قارجىلىق وپەراتسيالاردىڭ ءبارىن ەلەكتروندى سيفرلىق قولتاڭبا ارقىلى Qoldau.kz پلاتفورماسىنداعى Agroinsurance اقپاراتتىق سەرۆيسىندە جۇرگىزۋگە بولادى. بۇل جۇيەدە ساقتاندىرىلعان مالدىڭ اۋرۋعا شالدىعۋ دەرەگى، وعان يەسىنىڭ قانداي ەمدىك شارالار قولدانعانى تۋرالى مالىمەتتەر دە ەنگىزىلىپ وتىرادى.


سوڭعى جاڭالىقتار