ا. سوي ەلىمىزدە ۆاكسينا سالىنۋى ءتيىس حالىقتىڭ قانشا پايىزى ەكپە العانىن ايتتى
بۇل تۋرالى ق ر دەنساۋلىق ساقتاۋ ءمينيسترى الەكسەي سوي ايتىپ بەردى، دەپ حابارلايدى قازاقپارات ءتىلشىسى.
«حالىقتى كوروناۆيرۋس ينفەكسياسىنا قارسى ۆاكسينالاۋ جۇمىستارى جالعاسۋدا. قازىرگى ۋاقىتتا 9,4 ميلليون دوزا ۆاكسينا قولدانىلعان. ونىڭ ءبىرىنشى كومپونەنتىن 5480094 ادام سالعىزدى، بۇل ۆاكسينا الۋى ءتيىس حالىقتىڭ 55,4 پايىزىن قۇرايدى. ەكىنشى كومپونەنتىمەن 3941941 ادام نەمەسە ءتيىستى حالىقتىڭ 39,8 پايىزى قامتىلدى»، - دەدى مينيستر ۇكىمەتتىڭ بۇگىنگى وتىرىسىندا.
مينيسترلىك تاعى 4 ميلليون حالىق ءۇشىن قوسىمشا 8 ميلليون دوزا جەتكىزۋگە كەلىسىمدەر ورناتتى. جەتكىزۋ جۇمىستارى كەستەگە سايكەس جۇرگىزىلەدى.
«وسىعان بايلانىستى رەسپۋبليكادا ۆاكسينالاۋعا قولجەتىمدىلىك جەتكىلىكتى كولەمدە قامتاماسىز ەتىلگەن»، - دەيدى ا. سوي.
ايتا كەتەيىك، ەپيدەميولوگيالىق احۋالدى باعالاۋ ماتريتساسىنا سايكەس، قازاقستان رەسپۋبليكاسى 26-ماۋسىمنان بەرى «قىزىل» ايماقتا تۇر. تۇركىستان وبلىسىنان باسقا وڭىرلەردىڭ ءبارى «قىزىل» ايماقتا. 3-تامىزداعى جاعداي بويىنشا، رەسپۋبليكاداعى ينفەكسيالىق توسەك-ورىننىڭ 56 پايىزىندا، رەانيماتسيالىق توسەك-ورىننىڭ 44 پايىزىندا ناۋقاستار جاتىر.
اۆتور: ايجان سەرىكجان قىزى