اكەمنەن ايىرىلعانعا دەيىن كوروناۆيرۋسقا سەنگەن جوقپىز: استانالىقتار اكەسىنىڭ ساناۋلى كۇندە قالاي كوز جۇمعانىن ايتتى

نۇر-سۇلتان. قازاقپارات - ءبىر اپتا بۇرىن نۇر-سۇلتاندا سىزدىقوۆتار جانۇياسى وتاعاسىنان ايىرىلدى. ەر ادام تىنىس الۋ جەتكىلىكسىزدىگىنەن، وكپە ىسىنۋىمەن كوروناۆيرۋستان جانساقتاۋ بولىمىندە قايتىس بولدى.

وتباسى بۇل ۆيرۋسقا دەر كەزىندە نازار اۋدارماعانىنا وكىنەدى، دەپ حابارلايدى قازاقپارات اكىمدىكتىڭ سايتىنا سىلتەمە جاساپ.

«ءبارى كەنەتتەن بولدى. الدىمەن انام اۋىرىپ قالدى، سودان كەيىن مارقۇم اكەم. ونىڭ دەنساۋلىعى 2 كۇن ىشىندە كۇرت ناشارلاپ كەتتى. ەكەۋى بىردەن ك ۆ ي اۋرۋحاناسىنا جاتقىزىلدى»، - دەيدى گۇلجان سىزدىقوۆا.

مارقۇمنىڭ جاقىندارىنىڭ ايتۋىنشا، ونىڭ كوروناۆيرۋستان بولەك ەش جەرى اۋىرماعان، ياعني دەنساۋلىعىندا كىنارات بولماعان.

«ءبىز ولاردى قولىمىزدان كەلگەنشە قورعادىق. ءبىراق وقشاۋلانۋدان شارشاپ، قىدىرا باستادى، دوستارىمەن، تۋىستارىمەن كورىستى. ءبىز ولارعا قانشا رەت اباي بولىڭدار، بارلىق كارانتين شارالارىن ساقتاڭدار دەپ ەسكەرتتىك. ءالى كۇنگە دەيىن اكەمىزدىڭ ءومىرىن وسى ينفەكسيا جالماعانىنا سەنە الار ەمەسپىز. ءبىز قازاقستاندىقتارعا ۆيرۋس بار ەكەنىن جانە ونىڭ اسا قاۋىپتى ەكەنىن جەتكىزگىمىز كەلەدى. مۇنداي قايعىنى ەشكىمنىڭ باسىنا بەرمەسىن»، - دەيدى مارقۇمنىڭ بالالارى.

كوروناۆيرۋس ەر ادامنىڭ وكپە ورگانىن ءا دەگەننەن %36 عا قابىندىرعان. سودان كەيىن تىنىس الۋ جەتىسپەۋشىلىگى پايدا بولىپ، وكپە ىسىنۋىمەن رەانيماتسياعا جەتكىزىلدى.

«ءبىز ءبارى قالپىنا كەلىپ، جازىلىپ كەتەدى دەپ ويلادىق. ءبىراق ەكى اپتالىق كۇرەستەن كەيىن دارىگەرلەر بىزگە قايعىلى جاڭالىقتى جەتكىزدى - جۇرەگى شىداماي قايتىس بولدى. كوۆيدتىڭ كەسىرىنەن ءبىز ونىمەن دۇرىستاپ قوشتاسىپ، دەنەسىن ۇيگە اكەلە دە المادىق. بۇل ينفەكسيا بولعاندىقتان، ونى ءمايىتحانادان بىردەن زيراتقا الىپ كەتتى»، - دەيدى مارقۇمنىڭ بالالارى. دارىگەرلەر تەك ۆاكسيناتسيا ءسىزدىڭ جانە جاقىندارىڭىزدىڭ دەنساۋلىعىن قورعاۋعا مۇمكىندىك بەرەتىنىن ەسكە سالادى. ۇجىمدىق يممۋنيتەتتى قالىپتاستىرۋ ارقىلى عانا پاندەميانى جەڭۋگە بولادى.