ەلوردانىڭ اسكەري كوللەدجى العاشقى تالاپكەرلەردى قابىلدايدى
جاڭا وقۋ جىلىنىڭ باستالۋىنا ءبىر اي قالدى. كەڭەس وداعىنىڭ باتىرى، حالىق قاھارمانى، ارميا گەنەرالى ساعادات نۇرماعامبەتوۆ اتىنداعى اسكەري كوللەدج جاڭا مارتەبەدە العاشقى ءبىلىم الۋشىلاردى قابىلداۋعا دايىن. اسكەري وقۋ ورنى بيىل «جاس ۇلان» رەسپۋبليكالىق مەكتەبىنىڭ بازاسىندا قۇرىلدى. اسكەري كوللەدجدەگى وقۋ مەرزىمى ەكى جىل ون اي. وسى ۋاقىت ىشىندە اسكەري ءبىلىم الۋشىلار ساپتىق، وق اتۋ، دەنە دايارلىقتارىنىڭ نەگىزدەرىن مەڭگەرەدى.
سونداي-اق جەكە قۇرامدى باسقارۋ جانە اسكەري ىستەگى اۆتوماتتاندىرۋ جانە اقپارات تەحنولوگيالارى، قارۋ-جاراق پەن اسكەري تەحنيكاعا تەحنيكالىق قىزمەت كورسەتۋ، رادياتسيالىق، حيميالىق جانە بيولوگيالىق قورعاۋ اسكەرلەرىنىڭ بولىمشەلەرى مەن ينجەنەرلىك بولىمشەلەردى باسقارۋ داعدىلارىنا ماشىقتانادى.
اسكەري ءبىلىم ورداسىنا 15 جاستان 17 جاسقا دەيىنگى جاستار تۇسەدى.
ول ءۇشىن تالاپكەرلەر كاسىبي- پسيحولوگيالىق ىرىكتەۋدەن، مەديتسينالىق كۋالاندىرۋدان ءوتىپ، دەنە شىنىقتىرۋ دايارلىعىنان ەمتيحان تاپسىرۋى قاجەت. ەلوردالىق اسكەري كوللەدجگە قۇجاتتاردى قابىلداۋ تامىز ايىنىڭ 1 مەن 5 ى ارالىعىندا وتەدى.
تالاپكەرلەر اسكەري وقۋ ورنىندا ەمتيحان تاپسىرىپ، كونكۋرس ىرىكتەۋدەن وتەدى. اتا-اناسىنىڭ قامقورلىعىنسىز قالعان بالالارعا، اسكەري دايارلىقتىڭ قوسىمشا باعدارلامالارى بويىنشا ءبىلىم بەرۋ ۇيىمدارىنىڭ تۇلەكتەرىنە جەڭىلدىك قاراستىرىلعان. اسكەري قىزمەت وتكەرۋ كەزىندە قازا تاپقان، حابار-وشارسىز كەتكەن نەمەسە مۇگەدەك بوپ قالعان اسكەري قىزمەتشىلەردىڭ بالالارى، وزدەرى تاڭداعان ماماندىعىنا سايكەس كەلگەن جاعدايدا حالىقارالىق وليمپيادالار مەن عىلىمي كونكۋرستاردىڭ جەڭىمپازدارى دا باسىم قۇقىققا يە.