ميلاد كاريمي سپورتتىق گيمناستيكادان توكيو وليمپياداسىنىڭ ۇزدىك بەستىگىنە ەندى

نۇر- سۇلتان. قازاقپارات - توكيو وليميپاداسىندا سپورتتىق گيمناستيكادان جەكەلەگەن سناريادتار بويىنشا فينالدىق كەزەڭ باستالدى.

بۇگىن ەركىن جاتتىعۋدان وليمپيادا چەمپيوندارى مەن جۇلدەگەرلەرى انىقتالدى دەپ جازادى Olympic.kz.

بۇل جاتتىعۋدىڭ فينالدىق كەزەڭىندە قازاقستاندىق گيمناست ميلاد كاريمي دە سىنعا تۇسكەن بولاتىن. كاريمي ءوز باعدارلاماسىن ورىنداۋ بارىسىندا كىشىگىرىم قاتەلىكتەر جىبەرىپ، 14.133 ۇپاي جينادى. جارىس ناتيجەسى بويىنشا قازاقستاندىق گيمناست بەسىنشى ورىنعا تۇراقتادى.

ايتا كەتەلىك، بۇل سپورتتىق گيمناستيكادان قازاقستان كومانداسى وكىلدەرىنىڭ وليمپيادا ويىندارىندا كورسەتىپ وتىرعان ەڭ ۇلكەن ناتيجەلەرىنىڭ ءبىرى. اسىرەسە، ميلاد كاريمي ەركىن جاتتىعۋدان وليمپيادادا ۇزدىك بەستىككە ەنگەن العاشقى قازاقستاندىق گيمناست. ول توكيو وليمپياداسىنداعى كوپسايىس قورىتىندىسى بويىنشا 14-ورىنعا تۇراقتادى. ەندى كاريمي گيمناستيكالىق كەرمە بويىنشا وليمپيادا جۇلدەسىنە تالاسادى.