سوڭعى وليمپيادامدى ءساتتى وتكىزگىم كەلدى: ولگا رىپاكوۆا جانكۇيەرلەرىنە العىس ايتتى

None
None
نۇر- سۇلتان. قازاقپارات - لوندون - 2012 وليمپياداسىنىڭ چەمپيونى، بەيجىڭ-2008 جانە ريو-2016 وليمپيادا ويىندارىنىڭ جۇلدەگەرى ولگا رىپاكوۆا باسپا ءسوز ءماسليحاتىن وتكىزىپ، جانكۇيەرلەرىنە العىس ايتتى، دەپ حابارلايدى قازاقپارات ءتىلشىسى.

«بارلىق جانكۇيەرلەرگە، قازاقستاندىقتارعا قولداۋ كورسەتكەندەرىڭىز ءۇشىن، الەۋمەتتىك جەلىدە جازعان جىلى سوزدەرىڭىز ءۇشىن، قوڭىراۋ شالعاندارىڭىز ءۇشىن راحمەت ايتقىم كەلەدى. جان تەبىرەنتەتىن تىلەكتەر مەن قولداۋ بولدى. وسى ءتورت وليمپيادا بويى ءارقاشان مەنىمەن بىرگە بولدىڭىزدار، قولدادىڭىزدار. مەن ءۇشىن بۇل وتە ماڭىزدى»، - دەدى وليمپيادا چەمپيونى ورتالىق كوممۋنيكاتسيالار قىزمەتىندە.

سپورتشىنىڭ ايتۋىنشا، كوڭىل- كۇيى مەن جالپى جاعدايى جاقسى بولعان.

«مەن بۇرىنعىداي تولىق ويىن كورسەتۋگە دايىن بولدىم. نە نارسە دۇرىس شىقپاعانىن بىلمەيمىن. ءوزىم دە تولىق تۇسىنبەدىم. جاڭا عانا ستاديوننان كەلدىم، ءالى جاتتىقتىرۋشىمەن اڭگىمەلەسىپ، تالداۋ جاسامادىق. ارينە، ءوزىمنىڭ سوڭعى وليمپيادامدى ءساتتى وتكىزگىم كەلدى، جانكۇيەرلەرىمدى تاعى دا قۋانتقىم كەلدى. جەڭىس تۇعىرىنا شىعىپ، قۋانىش سەزىمىن سىيلاعىم كەلدى. ءبىراق بۇل ءاردايىم بولا بەرمەيدى. اۋا رايى كەرەمەت، جاعدايىمىز دا جاقسى، ءبىراق ءبىر نارسە بولماي قالدى. قاتەلىكتەردى قارايمىز جانە تالقىعا سالامىز»، - دەدى جەڭىل اتلەت.

ولگا رىپاكوۆا الدىڭعى جانە وسى وليمپيادالار اراسىندا ايىرماشىلىق سەزىلگەنىن اتاپ ءوتتى.

«مۇندا كورەرمەندەردىڭ جوقتىعىن ايتامىن. جارىس كەزىندە ەش كورەرمەن بولمادى. بۇل دا سەزىلەدى ەكەن. جانكۇيەرلەرگە جانە وليمپيادانىڭ ۇيىمداستىرۋ كوميتەتىنە تاعى دا ريزاشىلىعىمدى بىلدىرگىم كەلەدى، ولار قيىن جاعدايدا دا وليمپيادا ويىندارىن وتكىزدى. ولار ۇلكەن العىس پەن قۇرمەتكە لايىق»، - دەدى ولگا رىپاكوۆا.

سوڭعى جاڭالىقتار