تۇركيانىڭ التى پروۆينتسياسىندا ورمان ورتەنىپ جاتىر

انتاليا. انادولى - قازاقپارات - تۇركيانىڭ بىرنەشە پروۆينتسياسىندا ورمان ءورتىنىڭ تارالۋىن توقتاتۋ جانە ءسوندىرۋ ءۇشىنشى كۇنگە جالعاستى، دەپ حابارلايدى قازاقپارات انادولى اگەنتتىگىنە سىلتەمە جاساپ.

بۇگىن تۇستەن كەيىن انتاليا، ادانا، مەرسين، مۋگلا، وسمانييە جانە كايسەري پروۆينتسيالارىندا ءىرى ءورت وشاقتارى ءالى دە بار. 3 ۇشاق، 9 درون، پيلوتسىز تىكۇشاق، 38 تىكۇشاق، 680 ءورت ءسوندىرۋ ماشيناسى، 55 وزگە دە تەحنيكا، 4000 ءورت ءسوندىرۋشى ورمان ورتتەرىن ءسوندىرىپ جاتىر.

تۇركيانىڭ اۋىل شارۋاشىلىعى جانە ورمان شارۋاشىلىعى ءمينيسترى بەكير پاكدەميرلي ورتپەن كۇرەستە وڭ ديناميكا بايقالعانىن ايتتى. ورمان القاپتارىنداعى 57 ءورت وشاعى باقىلاۋعا الىندى، دەپ حابارلادى مينيستر. بۇعان دەيىن انتالياداعى ءورت سالدارىنان ءۇش ادام، مارماريستە ءبىر ادام قايتىس بولدى دەپ حابارلانعان بولاتىن.

زارداپ شەككەن 138 تۇرعىن اۋرۋحاناعا جەتكىزىلگەن، بىرەۋىنىڭ جاعدايى اۋىر دەپ باعالانادى. بۇعان دەيىن حابارلانعانداي، تۇركيا رەسپۋبليكاسى ۇكىمەتىنىڭ جانىنداعى توتەنشە جاعدايلاردىڭ الدىن الۋ جانە جويۋ باسقارماسىنىڭ (AFAD) اقپاراتى بويىنشا، ءورت 28-شىلدەدە تۇسكى ۋاقىتتا پروۆينتسيانىڭ ءتورت اۋدانىندا شىققان. ءورتتىڭ بۇلايشا جىلدام تارالۋىنا كۇننىڭ ىسۋى جانە قاتتى جەل ىقپال ەتتى. جەر ءۇستى قىزمەتتەرى مەن ءورت ءسوندىرۋ اۆياتسياسى اپاتپەن كۇرەسۋدە.

«ءورت كەزىندە قازا تاپقاندار مەن ونداعان جارالانعانداردىڭ اراسىندا ءبىزدىڭ ازاماتتارىمىز جوق»، - دەپ حابارلادى 29- شىلدەدە قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىسى ابزال ساپاربەك ۇلى.