انتالياداعى ورمان ورتىنەن ءۇش ادام قازا تاپتى
بۇل تۋرالى قازاقپارات انادولى اگەنتتىگىنە سىلتەمە جاساپ حابارلايدى.
AFAD (تۇركيا رەسپۋبليكاسى ۇكىمەتىنىڭ جانىنداعى توتەنشە جاعدايلاردىڭ الدىن الۋ جانە سالدارىن جويۋ باسقارماسى) مالىمەتى بويىنشا، ءورت 28-شىلدەدە تۇسكى كەزىندە انتاليا پروۆينتسيانىڭ ءتورت ايماعىندا ءورت شىققان. ءورتتىڭ جىلدام تارالۋىنا اپتاپ ىستىق پەن جەلدى اۋا- رايى ىقپال ەتكەن. ءورتتى اۋىزدىقتاۋعا ءورتى ءسوندىرۋ اۆياتسياسى مەن قۇرلىقتاعى توتەنشە جاعدايمەن كۇرەس قىزمەتتەرى جۇمىلدىرىلعان. ءورت سالدارىن جويۋعا 1 ۇشاق، 19 تىكۇشاق، 1 پيلوتسىز ۇشۋ اپپاراتى، 192 ءورت ءسوندىرۋ ماشيناسى، 30 قۇرىلىس تەحنيكاسى، 19 جەدەل جاردەم ماشيناسى، 5 دالا اسحاناسى جانە جەكە قۇرامنىڭ 1000 نان استام ادامى تارتىلعان.
«جالىننىڭ جولىندا قالعان 18 ەلدى مەكەننىڭ تۇرعىندارى قاۋىپسىز جەرگە كوشىرىلدى. ماناۆگات اۋدانىنداعى جاعداي باقىلاۋعا الىندى، ءبىراق اقسەكىدە ءورت باسىلعان جوق»، - دەدى تۇركيانىڭ اۋىل شارۋاشىلىعى جانە ورمان شارۋاشىلىعى ءمينيسترى بەكىر پاكدەمىرلى.
«انادولى» اگەنتتىگىنىڭ جازۋىنشا، ءورت سوندىرۋشىلەردى ۋاقىتشا تۇراقپەن قامتاماسىز ەتۋ ءۇشىن 1300 ادام سىياتىن 6 جاتاقحانا دايىندالعان. جەرگىلىكتى پوليتسيا مەن قۇتقارۋ قىزمەتتەرى وڭىردە ءورت قاۋپى ءالى سەيىلمەگەنىن ەسكەرتىپ جاتىر. قاۋىپتى اۋماقتارعا كىرەتىن اۆتوكولىك جولدارى جابىلىپ، قوزعالىس شەكتەلگەن. اپات ايماعىن اينالىپ وتەتىن بالاما جولدار ازىرلەنىپ جاتىر. ماناۆگات اۋدانىنىڭ گۋبەرناتورى مۇستافا يگىت ويماپىنار بوگەتىنە ءتۇسىپ كەتكەن 10 ازامات قۇتقارىلىپ، قاۋىپسىز جەرگە جەتكىزىلگەنىن ايتقان. ال بۇگىن تۇركيانىڭ مارماريس جانە ميلاس اتتى تۋريستىك قالالارىندا ورماندى- دالا القاپتار ورتەندى.
ونى جويۋ جانە تابيعي اپاتتان زارداپ شەككەندەردى ىزدەستىرۋ- قۇتقارۋ جۇمىستارى باستالىپ كەتتى. قازىر توتەنشە جاعداي بولعان اۋداندا بارلىق ساياحاتتار توقتاتىلدى. قازاقستاندىق تۋريستەر اراسىنان كومەك سۇراعاندار جوق.