سەرىك ساپيەۆ بوكسشىلاردىڭ كەمشىلىگى تۋرالى باقىت سارسەكبايەۆتىڭ سىنىنا جاۋاپ بەردى

نۇر- سۇلتان. قازاقپارات – ق ر م س م سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سەرىك ساپيەۆ بوكسشىلاردىڭ كەمشىلىگى تۋرالى بەيجىڭ وليمپياداسىنىڭ چەمپيونى باقىت سارسەكبايەۆتىڭ سىنىنا جاۋاپ بەردى، دەپ حابارلايدى قازاقپارات ءتىلشىسى.

«قاشىقتان كوبىرەك جۇمىس ىستەۋ، قارسىلاسقا شابۋىلداۋعا بايلانىستى نۇسقامالار بولدى، ارينە قارسىلاسقا شابۋىل جاساعان سوڭ دۇرىس قورعانىپ، ءوزى سوققى جاساۋ كەرەك ەدى. باقىت سارسەكبايەۆ وسىنى ايتقىسى كەلدى، مەن ونىمەن تولىق كەلىسەمىن، ال تومپەشتەپ ۇرۋ ءبارىنىڭ قولىنان كەلەدى. ول دۇرىس ايتادى، قورعانا دا ءبىلۋ كەرەك، قارسى شابۋىلدى جاساۋ كەرەك»، - دەپ جاۋاپ بەردى س. ساپيەۆ ورتالىق كوممۋنيكاتسيالار قىزمەتىندە ءتىلشى سۇراعىنا.

سەرىك ساپيەۆ بۇل تۇرعىدا جاتتىقتىرۋشىلاردىڭ دا جەتىلىپ، ءوز شاكىرتتەرىمەن جۇمىس ىستەۋى كەرەگىن ايتتى. بۇعان دەيىن سەرىك ساپيەۆ قازاقستان بوكسشىلارى قانشا جۇلدە اكەلۋى مۇمكىن ەكەنىن ايتقان ەدى.

«بوكستان جۇلدە الۋعا ءالى دە ءۇمىتىمىز بار. ءۇش- ءتورت مەدال الۋعا بولادى. ەندى ساكەن بيبوسىنوۆتىڭ قارسىلاسى - فرانسيا بوكسشىسى، ول وتە مىقتى، ودان وتسە كەلەسى قارسىلاستارىنىڭ دەڭگەيى فرانسيالىقتاي بولمايدى. سوسىن ءابىلحان امانقۇلدىڭ، قامشىبەك قوڭقابايەۆتىڭ جانە زاكىر ءسافيۋلليننىڭ قاسرىلاستارى ايتارلىقتاي كوشباسشىلار ەمەس، ولاردى جەڭۋگە بولادى. سول ءۇشىن قالعان ءتورت بوكسشىمىز ءتورت مەدال اكەلۋى دە مۇمكىن»، - دەدى بوكسشى.