قازاقستان پرەزيدەنتى اريزونا ۋنيۆەرسيتەتىنىڭ دەلەگاتسياسىن قابىلدادى
كەزدەسۋ بارىسىندا اريزونا ۋنيۆەرسيتەتى مەن وتاندىق جوعارى وقۋ ورىندارى اراسىنداعى ستراتەگيالىق سەرىكتەستىك، عىلىمي جانە اكادەميالىق دامۋ ماسەلەلەرى تالقىلاندى. پرەزيدەنتتىڭ ايتۋىنشا، جاھاندانۋ ۇدەرىسىنىڭ الەم ەلدەرىندەگى ءبىلىم بەرۋ ساياساتىنا تيگىزەتىن اسەرى ارتىپ كەلەدى.
- كەيىنگى جيىرما جىل ىشىندە ەلىمىز جوعارى ءبىلىم بەرۋ سالاسىنداعى حالىقارالىق ىنتىماقتاستىقتى جانداندىردى. قازاقستان مەن ا ق ش اراسىنداعى سەرىكتەستىك قاتىناستار كوپتەگەن سالانى قامتيدى. اسىرەسە، عىلىمي زەرتتەۋ جانە ستۋدەنتتەر مەن وقىتۋشىلار الماسۋ سالالارىنداعى ىقپالداستىق ماڭىزدى سانالادى، - دەدى مەملەكەت باسشىسى.
قاسىم- جومارت توقايەۆ الەمنىڭ جەتەكشى جوعارى وقۋ ورىندارىمەن بايلانىستاردىڭ كەڭەيۋى وتاندىق ۋنيۆەرسيتەتتەردىڭ اكادەميالىق جانە زەرتتەۋشىلىك الەۋەتىن ارتتىرۋعا مۇمكىندىك بەرەتىنىن ايتتى. پرەزيدەنت اريزونا ۋنيۆەرسيتەتىنىڭ قازاقستان رەسپۋبليكاسى ءبىلىم جانە عىلىم مينيسترلىگىنىڭ ستراتەگيالىق سەرىكتەسى بولۋ، سونداي- اق، ءبىلىم بەرۋ ساپاسىن بىرلەسە ارتتىرۋ جونىندەگى باستاماسىنا قولداۋ ءبىلدىردى.
امەريكالىق جوعارى وقۋ ورنىمەن ىنتىماقتاستىق اياسىندا وڭىرلىك ۋنيۆەرسيتەتتەر بازاسىندا حالىقارالىق ستاندارتتارعا ساي بىرلەسكەن ءبىلىم باعدارلامالارى ازىرلەنەدى. اريزونا ۋنيۆەرسيتەتىنىڭ وكىلدەرى قازاقستاننىڭ ءبىرقاتار جوعارى وقۋ ورىندارىنا باردى. سونىڭ ىشىندە م. قوزىبايەۆ اتىنداعى سولتۇستىك قازاقستان ۋنيۆەرسيتەتى ستراتەگيالىق سەرىكتەس رەتىندە قاراستىرىلىپ وتىر.
