شاۆكات ميرزييەۆ وزبەكستاندىقتاردى بەلسەندى تۇردە ۆاكسينا الۋعا شاقىردى
بۇل تۋرالى ەل پرەزيدەنتى شاۆكات ميرزييەۆتىڭ توراعالىعىمەن وتكەن بەينەسەلەكتورلىق جينالىستىڭ قورىتىندىسىندا ايتىلدى، دەپ حابارالايدى قازاقپاراتتىڭ مەنشىكتى ءتىلشىسى.
«مەنى الەمنىڭ جەتەكشى عالىمدارىنىڭ زەرتتەۋى قىزىقتىردى: ولاردىڭ باعالاۋىنشا، كوروناۆيرۋس پاندەمياسى 10 جىلعا سوزىلماق. بىزگە وسى ۆيرۋسپەن ءومىر ءسۇرىپ ۇيرەنۋ كەرەك. اۋرۋدىڭ تارالۋى تاعى دا كۇشەيدى. مۇنداي قيىن جاعدايدا ازاماتتاردان باتىل شەشىمدەر قابىلداۋ تالاپ ەتىلەدى، سول سەبەپتى بارلىعىنا ۆاكسينا الۋ كەرەك»، - دەدى وزبەكستان پرەزيدەنتى.
ول ۇكىمەتتىڭ ءار ازامات ءۇشىن كۇرەسەتىنىن جانە بۇل ىسكە كەرەكتى قاراجاتتى جۇمسايتىنىن اتاپ ءوتتى. سونىمەن قاتار ازاماتتاردىڭ دا ءوز ءومىرى مەن دەنساۋلىعى ءۇشىن جاۋاپتى ەكەنىن ەسكە سالدى.
«ۆاكسينا العاندار اۋرۋحانادان ءتورت كۇن ىشىندە شىعىپ جاتىر، ال ەكپە الماعاندار قاتتى اۋىرۋدا. ءيا، ۆاكسينا العاننان كەيىن دە اۋرۋدى جۇقتىرۋىڭىز مۇمكىن، الايدا بۇل جاعدايدا اۋرۋ جەڭىل وتەدى»، دەپ اتاپ ءوتتى شاۆكات ميرزييەۆ.
ەسكە سالا كەتەيىك، ەپيدەميولوگيالىق احۋالدىڭ ورشۋىنە بايلانىستى وزبەكستاندا 28- شىلدەدەن باستاپ كارانتيندىك شارالار كۇشەيتىلدى. 17 -شىلدە كۇنى كوروناۆيرۋسپەن كۇرەس جونىندەگى ارنايى كوميسسيا 18 جاستان جوعارى ساۋدا، قوعامدىق تاماقتاندىرۋ، قىزمەت كورسەتۋ جانە ءبىلىم سالاسىنداعى ازاماتتاردى، سونىمەن قاتار اسكەريلەر مەن قۇقىق قورعاۋ ورگاندارىنىڭ قىزمەتكەرلەرىن مىندەتتى ۆاكسينالاۋ تۋرالى شەشىم قابىلدادى. قازىرگى كەزدە وزبەكستان رەسپۋبليكاسىنىڭ پارلامەنتى حالىقتىڭ جۇمىس ىستەيتىن بولىگىن مىندەتتى ۆاكسينالاۋ تۋرالى زاڭ جوباسىن قاراستىرۋدا.
اۆتور: ءبيبىحان سەرىكوۆا