سولتۇستىك شۇعىلاسىن سۋرەتكە تۇسىرەتىن فوتوگراف قوناقۇيگە تەگىن ورنالاستىرىلادى
ولار 3 اپتا بويى سولتۇستىك شۇعىلاسىن فوتوسۋرەتكە ءتۇسىرىپ، ساپالى كونتەنت دايىندايتىن ادام ىزدەيدى. سىياقى رەتىندە قوناقۇيدە اقىسىز تۇرۋ، تەگىن تاماق جانە اۋە بيلەتتەرى ۇسىنىلادى، دەپ حابارلايدى Travel + Leisure.
فوتوگراف جۇمىسپەن قىركۇيەكتىڭ ورتاسىنان قازاننىڭ ورتاسىنا دەيىن قامتاماسىز ەتىلەدى. ءوتىنىش بەرۋشىدەن جوعارى ساپالى بەينەلەر تالاپ ەتىلەدى. سونىمەن قاتار، ولاردىڭ سۋرەتكە ءتۇسىرۋ تاجىريبەسى، الەۋمەتتىك مەديا داعدىلارى، يسلاندياعا جاساعان بۇرىنعى ساپارلارى جانە كوروناۆيرۋسقا قارسى ۆاكتسيناتسيا تۋرالى اقپارات بەرۋى دە ماڭىزدى. ءوتىنىشتى تولتىرۋ بارىسىندا مۇنىڭ ءبارى سۇرالادى. فوتوگرافتار بۇعان قوسا قىسقا موتيۆاتسيالىق حات جازىپ، قوناق ءۇي ولاردى نە ءۇشىن تاڭداۋ كەرەكتىگىن ءتۇسىندىرۋى كەرەك.
ءبىر قىزىعى، اتالعان وتەلگە استرونومدار ءجيى بارادى. ويتكەنى قوناق ۇيدە جوعارى دەڭگەيلى ەكى تەلەسكوپ ورنالاستىرىلعان جەكە وبسەرۆاتوريا بار. مەكەمە سونىمەن قاتار ءوزىنىڭ وسى سەكىلدى ستاندارتتى ەمەس ماركەتينگتىك ۇسىنىستارىمەن تانىمال. مىسالى، 2020 -جىلى قوناقۇي 29 اقپاندا سۇيىكتىسىنە ۇسىنىس جاساعان ايەلدەرگە اقىسىز تۇرۋدى ۇسىنعان. پاندەميا كەزىندە عاشىقتار كۇنىنە ارناپ برون جاساعانداردىڭ بارلىعى قوناقۇيدەن قۇتتىقتاۋ حاتتارىن الدى.
ەستەرىڭىزگە سالا كەتەيىك، سولتۇستىك شۇعىلاسى — بىزگە ءمالىم ەڭ جارقىن تابيعات قۇبىلىستارىنىڭ ءبىرى. ولار مىڭ جىلدار بويى ادامداردى تاڭداندىرىپ كەلدى. پوليارلىق شۇعىلا العاش رەت 30 مىڭ جاستاعى كروماننون ۇڭگىرلەرىندەگى سۋرەتتەردە بەينەلەنگەن. بۇل تۋرالى دەرەكتەر ءبىزدىڭ زامانىمىزدان بۇرىنعى 2600 -جىلعى كونە قىتاي جازبالارىندا كەزدەسەدى.
عاجايىپ تابيعات قۇبىلىسى كەيدە بۇلت سياقتى، كەيدە تولقىن، سپيرال، جانە گوريزونت تۇرىندەگى ءتۇرلى پىشىندەردە كورىنەدى. وسىعان بايلانىستى ءار حالىقتىڭ ءوز نانىم- سەنىمدەرى بار. مىسالى، فينليانديادا ولاردى «وتتى تۇلكىلەر» دەپ اتاسا، شوتلانديادا «پەرىشتە»، سكانديناۆيادا ونى بالىق اۋلاۋدىڭ ءساتتى وتەتىنىنەن حابار بەرەتىن قۇبىلىس رەتىندە قارايدى. ينۋيتتەر بولسا، ولاردى «تۇنگى اسپاندا بيلەيتىن جانۋارلار» دەپ اتايدى ەكەن.
massaget.kz