ۇلكەن الماتى اينالما جولى قالاي سالىنىپ جاتىر
«ورتالىق- وڭتۇستىك» ءدالىزى جوباسى اياسىندا سالىنىپ جاتقان اتالعان جول قۇرىلىسىنىڭ سالىنۋ بارىسىمەن «باكاد ينۆەستيتسيالار مەن وپەراتسيالار» ج ش س ديرەكتورى ايمان جانۇزاقوۆا تانىستىردى، دەپ حابارلايدى قازاقپارات ءتىلشىسى.
«اينالما جولدىڭ ۇزىندىعى 66 شاقىرىمدى قۇرايدى. ونىڭ قۇرىلىسى 2019 -جىلى باستالىپ، قازىر قىزۋ جۇمىس ءجۇرىپ جاتىر. 66 شاقىرىم اۆتوموبيل جولىنىڭ 13 شاقىرىمى 4 جولاقتى، قالعانى 6 جولاقتى بولادى. تاسجول 1-دارەجەلى بولماق جانە وندا ساعاتىنا 150 شاقىرىم جىلدامدىقپەن جۇرۋگە بولادى. جالپى بۇل جەردە 8 باعىت بويىنشا اينالما جول ءبىر- بىرىمەن بايلانىسادى جانە ول ءوزارا 38 كوپىردى جالعايدى. كەلىسىمشارت پەن جوبانىڭ جوسپارىنا سايكەس، ءبىز 2024 -جىلى اياقتاۋىمىز كەرەك، دەگەنمەن جۇمىستى ەرتە باستاعاندىقتان نەگىزگى جۇمىستاردى ۋاقىتانان بۇرىن 2022 -جىلى اياقتاپ، 2023 -جىلى پايدالانۋعا بەرۋدى جوسپارلاپ وتىرمىز. جانە جول اقىلى بولادى»، - دەدى ايمان جانۇزاقوۆا.
ونىڭ ايتۋىنشا، اتالعان كومپانيا ۇلكەن الماتى اۆتوموبيل جولىنىڭ ساپاسى مەن كۇتىمىنە 16 جىل بويى جاۋاپتى بولادى. ءوز كەزەگىندە «QazAvtoJol» ۇلتتىق كومپانياسى اق الماتى وبلىستىق فيليالىنىڭ ديرەكتورىنىڭ مىندەتىن اتقارۋشى بولاتبەك ايتبايەۆ ءۇ ا ا اج مەملەكەتتىك ماڭىزدى جوبا ەكەنىن جانە قۇرىلىس بارىسىمەن ۇكىمەت باسشىسىنىڭ ءوزى كەلىپ تانىسقانىن ايتتى.
«ۇلكەن الماتى اينالما اۆتوموبيل جولى (ءۇ ا ا ا ج) بىرىنشىدەن، كولىك كەپتەلىسى ماسەلەسىن ازايتادى، ەكىنشىدەن قالانىڭ باسقا وڭىرلەرمەن قارىم- قاتىناسى ءۇشىن ماڭىزدى. اينالما جول الماتى قالاسىمەن قاتار، وبلىستىڭ قاراساي، ىلە جانە تالعار اۋداندارىن بايلانىستىرادى. جوبانى ۋاقىتىنان بۇرىن اياقتاپ، 2023 -جىلى حالىق يگىلىگىنە بەرەمىز دەپ كوزدەپ وتىرمىز»، - دەيدى ب. ايتبايەۆ.
وڭىرلىك «QazAvtoJol» باسشىسىنىڭ سوزىنە سەنسەك، بۇگىندە الماتى وبلىسىندا 725 مىڭ شاقىرىم جول سالىنىپ نەمەسە كۇردەلى جوندەۋ جاسالىپ جاتىر. جانە وڭىردەگى كولىك جولىنىڭ 80 پايىزى قاناعاتتانارلىق دەڭگەيدە.
«حالىق تاراپىنان كوبىنەسە تالدىقورعان، وسكەمەنگە اپاراتىن اۆتوموبيل جولدارىنىڭ ناشارلىعىنا قاتىستى نارازىلىقتار كەلىپ ءتۇسىپ جاتادى. سەبەبى اتالعان ايماقتاردا جول جوندەۋ جۇمىستارى ءجۇرىپ جاتىر ياعني اينالما جول كوپ كەزدەسەدى. وسى ورايدا جولاۋشىلارعا كەدەرگىنىڭ ۋاقىتشا ەكەنىن، جول قۇرىلىسى بىتكەن سوڭ، ولقىلىقتاردىڭ جويىلاتىنىن ايتا كەتكىم كەلەدى»، - دەيدى ول.
بۇعان دەيىن ب. ايتبايەۆ «التىن وردا» بازارى ماڭىنداعى جولدىڭ قاشان پايدالانۋعا بەرىلەتىنىن ايتقان ەدى. ودان بولەك، فيليال باسشىسى شامالعاندا تەمىرجول كوپىرى سالىنىپ جاتقانىنان حاباردار ەتتى. ايتا كەتەيىك، «QazAvtoJol» ۇلتتىق كومپانياسى ا ق «ورتالىق- وڭتۇستىك» باعىتىنداعى نۇر- سۇلتان - قاراعاندى - بالقاش - پريوزەرسك - بۋرىلبايتال - شۋ - الماتى ايماقتارىنداعى جولداردىڭ سالىنۋ بارىسىن تانىستىرىپ، كورسەتۋ ماقساتىندا باسپا ءسوز تۋرىن ۇيىمداستىردى.
