التىن وردا بازارى ماڭىنداعى جول قاشان پايدالانۋعا بەرىلەدى

الماتى. قازاقپارات - الماتىداعى «التىن وردا» بازارى ماڭىندا جول مەن كوپىر سالىنىپ جاتىر. ونىڭ قۇرىلىسى جىل سوڭىنا دەيىن اياقتالىپ، پايدالانۋعا بەرىلەدى، دەپ حابارلايدى قازاقپارات ءتىلشىسى.

«QazAvtoJol» ۇلتتىق كومپانياسى اق «ورتالىق- وڭتۇستىك» باعىتىنداعى نۇر- سۇلتان - قاراعاندى - بالقاش - پريوزەرسك - بۋرىلبايتال - شۋ - الماتى ايماقتارىنداعى جولداردىڭ سالىنۋ بارىسىن تانىستىرىپ، كورسەتۋ ماقساتىندا باسپا ءسوز تۋرىن ۇيىمداستىردى. سونىڭ بارىسىندا الماتى قالاسىنداعى «التىن وردا» بازارى ماڭىندا كوپىر جول قۇرىلىسىنىڭ جۇمىسى تانىستىرىلدى.

«التىن وردا» بازارى ماڭىنداعى جولايىرىقتا قازىرگى ۋاقىتتا بەتون- سەمەنتتەۋ جۇمىستارى ءجۇرىپ جاتىر.

بۇل جولدىڭ الماتىلىقتار ءۇشىن ماڭىزى زور، ويتكەنى بۇل جول قالاداعى بىرنەشە ءىرى ساۋدا ورتالىقتارىنا الىپ بارادى. جاڭا جوسپارعا سايكەس بۇل جول جولاعى 8-دەن 10-عا ارتادى. جانە باستىسى قاۋىپسىزدىككە اسا ءمان بەرىلەدى. سەبەبى بۇل جولايىرىق توعىز جولدىڭ تورابى، سوندىقتان جول- كولىك وقيعاسى جانە كەپتەلىس ماسەلەسى بار. وسى ورايدا سالىنىپ جاتقان جاڭا اۆتوموبيل جولى بويىندا قوسىمشا جول ءجۇرۋ ەرەجەلەرى ەنگىزىلەتىن بولادى. ەستاكادانىڭ ۇزىندىعى 600 مەتردى قۇرايدى. قۇرىلىس جوسپارىنا سايكەس، جىلدىڭ سوڭىنا دەيىن پايدالانۋعا بەرىلەدى» - دەدى «QazAvtoJol» ۇلتتىق كومپانياسى ا ق الماتى وبلىستىق فيليالىنىڭ ديرەكتورىنىڭ مىندەتىن اتقارۋشى بولاتبەك ايتبايەۆ.

ونىڭ ايتۋىنشا، وتكەن جىلى پاندەمياعا بايلانىستى قۇرىلىس جۇمىسى توقتاپ تۇردى.

«ەستاكادا قۇرىلىسىن بيىل مامىر ايىندا باستادىق. اۆتوموبيل جولى 2 كوپىردەن جانە 4 جولاقتان تۇرادى. جول سالۋمەن 250 ادام اينالىسىپ جاتىر، دەگەنمەن جۇمىس كومانداسى ءالى دە جاساقتالۋ ۇستىندە. كولىك جولىنىڭ ۇزىندىعى 4 شاقىرىمعا جۋىقتى قۇراسا، كوپىردەگى جولدىڭ ۇزىندىعى 600 مەتردى قۇرايدى. بۇل اۆتوكولىك جولى الماتىنىڭ باتىس اۋماعىندا ورنالاسقان ياعني قالانى شىمكەنت قالاسىمەن جانە وزبەكستان شەكاراسىمەن بايلانىستىراتىن بولادى»، - دەدى اتالعان جوبانىڭ جەتەكشىسى سمەت ابيلوۆ.

بۇعان دەيىن حابارلاعانىمىزداي، شامالعاندا تەمىرجول اپاتىنان سوڭ جاڭا كوپىر سالىنىپ جاتىر.

اۆتور: ءالي يبرايەۆ