مۇنداي سايلاۋ بولعان ەمەس: قاسىم- جومارت توقايەۆ جاڭادان سايلانعان اۋىل اكىمدەرىمەن اڭگىمەلەستى
قاسىم- جومارت توقايەۆ اقمولا وبلىسىنىڭ جاڭادان سايلانعان اۋىل اكىمدەرىمەن كەزدەستى. پرەزيدەنت اۋىلداردىڭ، اۋداندىق ماڭىزى بار قالالار مەن اۋىلدىق وكرۋگتەردىڭ باسشىلارىنىڭ تىكەلەي سايلاۋى ساياسي جاڭعىرۋدىڭ جاڭا كەزەڭىن بىلدىرەتىن ماڭىزدى ءارى تاريحي وقيعا ەكەنىن اتاپ ءوتتى.
- شىن مانىندە، ەل تاريحىندا وسىنداي سايلاۋ العاش رەت اشىق ءارى ءادىل وتكىزىلىپ وتىر. حالىق تاراپىنان ەشقانداي شاعىم تۇسپەدى. مۇنداي سايلاۋ بولعان ەمەس. ءبىز سايلاۋدى بىرەۋگە ۇناۋ ءۇشىن ەمەس، ازاماتتاردىڭ تۇرمىس ساپاسىن جاقسارتۋ ءۇشىن وتكىزەمىز، - دەدى قاسىم- جومارت توقايەۆ.
مەملەكەت باسشىسى بۇل سايلاۋدىڭ اۋىلداعى اعايىنعا ءوز الەۋەتىن تولىق پايدالانىپ، ەلدى مەكەندەردى دامىتۋ ءۇشىن جاڭا مۇمكىندىك بەرەتىنىنە توقتالدى. پرەزيدەنت اكىمدەردىڭ سايلاۋالدى جۇمىستارىنا وڭ باعا بەرىپ، ولاردىڭ قىزمەتىنە تابىس تىلەدى. قاسىم- جومارت توقايەۆ ولاردىڭ حالىق سەنىمىن اقتاۋ ءۇشىن قولدان كەلگەننىڭ ءبارىن جاسايتىنىنا سەنىم ءبىلدىردى. جيىن سوڭىندا جاڭادان سايلانعان اكىمدەر مەملەكەت باسشىسىنا ءوز باستاماسىن جۇزەگە اسىرعانى جانە ەلىمىز بەن اۋىلدارىنىڭ يگىلىگى جولىندا ەڭبەك ەتۋگە مۇمكىندىك بەرگەنى ءۇشىن العىس ايتتى.