ەپيدەميولوگيالىق جاعدايعا بايلانىستى قىتايعا جۇك جونەلتۋ كەشىگىپ جاتىر – ق ت ج

نۇر- سۇلتان. قازاقپارات - ەپيدەميولوگيالىق احۋالدىڭ قۇبىلۋىنا بايلانىستى قىتايعا تەمىرجول ارقىلى جۇك جونەلتۋ كەشىگەدى.

بۇل تۋرالى ورتالىق كوممۋنيكاتسيالار قىزمەتىنىڭ بريفينگىندە «قازاقستان تەمىر جولى» ۇلتتىق كومپانياسىنىڭ باسقارما ءتوراعاسىنىڭ ءبىرىنشى ورىنباسارى قانات الماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.

«جالپى، پاندەميا باستالعاننان بەرى قىتايمەن اراداعى جۇك تاسىمالى وتە كۇردەلى جاعدايدا تۇر. بىلتىرعى 15- قاراشادان باستاپ ولار جابىق ۆاگونداردا ازىق- تۇلىك جۇگىن قابىلداۋدى توقتاتتى. مۇنى جابىق ۆاگونداردىڭ ىشىندە ۆيرۋس قالدىقتارى بولۋ ىقتيمالدىعىمەن بايلانىستىرىپ وتىر. اقپان ايىنىڭ ورتاسىنان باستاپ باياۋ بولسا دا، قابىلداي باستاعان. بۇگىندە قازان مەن قاراشا ايىنا دەيىن تيەلگەن جۇكتەردى قىتاي تاراپىنا بەردىك. شەكارادا ازىق- تۇلىك تيەلگەن جابىق ۆاگوندار قاڭتارىلىپ تۇرعان جوق. ءبىراق قىتاي تەمىرجولشىلارى، شىڭجاڭ ۇيعىر اۆتونوميالىق اۋدانىنىڭ ۇكىمەتى ازىق- تۇلىك قاپتالعان جابىق ۆاگوندا جونەلتۋگە تىيىم سالدى»، - دەيدى ق. الماعامبەتوۆ.

ۇلتتىق كومپانيا وكىلى وسى شەكتەۋگە بايلانىستى قازاقستاندىق جۇك جونەلتۋشىلەر ازىق- تۇلىك تاۋارلارىن قىتاي تاراپىنا كەرىلمەلى ۆاگوندار (بينبەگ- ۆاگوندار) ارقىلى جونەلتۋگە قام جاساپ جاتىر. ال ازىق- تۇلىك تۇرىنە جاتپايتىن جۇكتەرگە ەشقانداي تىيىم جوق كورىنەدى. دەگەنمەن، قانات الماعامبەتوۆتىڭ ايتۋىنشا، قىتاي بويىنشا جالپى ەكسپورت پەن ترانزيت بويىنشا پروبلەمالار بار.

«بۇل قىتاي تاراپىنىڭ ەپيدەميولوگيالىق جاعدايدى قاتاڭ باقىلاۋعا الۋىنان تۋىنداپ وتىر. مەملەكەتارالىق ستانسالارداعى جۇمىسشىلاردىڭ ءبارى ءار ءۇش كۇن سايىن پ ت ر تەستىلەۋدەن وتەدى. سانيتارلىق- ەپيدەميولوگيالىق باقىلاۋ قىزمەتكەرلەرىنسىز ۆاگوندار اشىلمايدى، كونتەينەرلەر قايتا تيەلمەيدى. مۇنىڭ ءبارى ۆاگوندار مەن پويىزداردىڭ قىتاي جاعۋىنا ءوتۋ قارقىنىنا اسەر ەتىپ وتىر. «دوستىق» ستانسياسىنا باعىت العان 72 پويىز، الاكول ستانسياسىنا باعىت العان 25 پويىز قاڭتارىلىپ تۇر. بۇل ۆاگونداردا نەگىزىنەن مامىر- ماۋسىم ايلارىندا تيەلگەن استىق، كوكس پەن كەن بار»، - دەدى ق ت ج وكىلى.

اۆتور: ەسىمجان ناقتىباي