وليمپيادا جەڭىمپازدارى مەن جۇلدەگەرلەرىنە ماسكانى شەشۋگە رۇقسات ەتىلدى

نۇر-سۇلتان. قازاقپارات - توكيوداعى وليمپيادا ويىندارىنىڭ جۇلدەگەرلەرىنە وليمپيادا ۇيىمداستىرۋشىلارى ماراپاتتاۋ راسىمىندە سۋرەتكە ءتۇسۋ كەزىندە 30 سەكۋندقا ماسكانى شەشۋگە رۇقسات ەتتى.

بۇل تۋرالى حالىقارالىق وليمپيادا كوميتەتىنىڭ سايتىنان ءمالىم بولدى، دەپ حابارلايدى قازاقپارات BaigeNews.kz سايتىنا سىلتەمە جاساپ.

ءانۇران بىتكەننەن كەيىن سپورتشىلارعا ماكسيمۋم 30 سەكۋندقا ماسكا شەشۋگە بولاتىنى تۋرالى بەلگى بەرىلەدى. بۇل كەزدە جۇلدەگەرلەر بۇرىنعىشا الەۋمەتتىك اراقاشىقتىقتى ساقتاۋ كەرەك بولادى. بۇدان كەيىن وليمپياداشىلارعا ماسكانى قايتا تاعۋ كەرەكتىگى جونىندە تاعى ءبىر بەلگى بەرىلەدى.

سول كەزدە ماسكا تاققان جەڭىمپازدارمەن ولاردىڭ تۇعىرىندا سۋرەتكە تۇسۋگە رۇقسات ەتىلمەك. ەسكە سالا كەتەيىك، قازاقستان ازىرگە بيىلعى وليمپيادا ويىندارىندا ەكى «قولا» الدى. ەلىنە جەڭىستى دزيۋدوشى ەلدوس سمەتوۆ پەن اۋىر اتلەتشى يگور سون اكەلدى.