ەلدوس سمەتوۆ - توكيو وليمپياداسىنىڭ قولا جۇلدەگەرى
60 كەلى سالماقتا سىنعا تۇسكەن ەلدوس قولا ءۇشىن جەكپە- جەكتە نيدەرلاند وكىلى تورنيە تساكادجوەنى جەڭدى. جەڭىمپاز قوسىمشا ۋاقىتتا انىقتالىپ، ەلدوس «ۆاززاري» ۇپايىن يەلەندى.
وسىلايشا، قازاقستاندىق دزيۋدوشى توكيو وليمپياداسىنىڭ قولا مەدالىن يەلەندى.
ەسكە سالا كەتسەك، ەلدوس سمەتوۆ جارتىلاي فينالدىق ايقاستا جاپوندىق ناوحيسە تاكاتوعا جول بەردى. ايتا كەتكەن ءجون، ەلدوس 2016 -جىلعى وليمپيادادا ءدال وسى سالماقتا كۇمىس جۇلدەگە يە بولعان ەدى. سونىمەن قاتار الەم چەمپيونى (2015)، ازيا ويىندارى مەن چەمپيوناتىنىڭ جەڭىمپازى. ال ناوحيسا تاكاتو برازيليادا وتكەن ءتورت جىلدىقتىڭ باستى باسەكەسىندە قولانى قاناعات تۇتقان بولاتىن.
دزيۋدودان توكيو وليمپياداسىنىڭ قولا جۇلدەگەرى اتانعان ەلدوس سمەتوۆ Olympic.kz سايتىنا سۇحبات بەرىپ، ەكىنشى وليمپياداداعى ەكىنشى مەدالىنە قاتىستى ويىمەن ءبولىستى.
«شىنى كەرەك، مەن قولا ەمەس، التىن الامىن دەپ كەلدىم. ريو وليمپياداسىنان كەيىن تاتاميدەن الىستاپ كەتپەي، ۇلكەن سپورتتا قالۋىمنىڭ دا ءبىر سەبەبى وسى ەدى. كۇمىستەن كەيىن التىن العىم كەلدى. ەلىمىزدىڭ ءانۇرانىن شارىقتاتىپ، كوك بايراعىمىزدى بيىكتەن كورۋدى ارماندادىم. سول ءۇشىن تىنباي ەڭبەك ەتتىم دە. ءبىراق ماعان بۇيىرىپ تۇرعانى قولا جۇلدە ەكەن. مەن بارىمدى سالدىم. سپورتقا ارناعان وسىنشا جىلداعى بار ونەرىمدى، بار كۇشىمدى بۇگىن توكيو تاتاميىنە تاستاپ شىقتىم. بويىمدا كۇرەسكە دەگەن قانداي قاسيەت بولسا، سونىڭ ءبىرىن دە اياپ قالمادىم. جارتىلاي فينالداعى جەكپە- جەكتى كوردىڭىزدەر. وتە تارتىستى ءوتتى. قايتا- قايتا شابۋىلعا يەك ارتىپ، قارسىلاسىمدى تۇقىرتۋعا تىرىستىم. الايدا، جەڭىس بۇگىن مەنىڭ جاعىمدا ەمەس ەكەن. ءيا، جاپوندىق بالۋان ناوحيسا تاكاتو مەنىمەن كەزدەسۋگە فينالدىق بەلدەسۋگە شىققانداي دايىندىقپەن كەلدى. ونىڭ فينالعا جانە وعان دەيىنگى جەكپە- جەكتەرگە قالاي دايىندالعانىن كوردىم. جارتىلاي فينالعا ەرەكشە اسەرمەن بەتتەدى. ەكەۋمىز تالاي مارتە كەزدەسىپ ءجۇرمىز. ءبىر- ءبىرىمىزدى جاقسى بىلەمىز. بۇگىنگى بەلدەسۋدىڭ تىم ۇزاققا سوزىلعانىنىڭ سەبەبى دە وسى.
2020 -جىلدىڭ باسىندا ءبىز ناعىز بابىمىزدا بولدىق. الايدا، الەمدەگى پاندەميا سالقىنىن تيگىزدى. سەگىز- توعىز اي بويى بىردە ءبىر جارىسقا قاتىسقان جوقپىز. دەسە دە، بۇل كۇندەردىڭ ءبارى ارتتا قالدى، قيىندىقتىڭ ءبارىن جەڭىپ شىقتىق. سوعان قۋانامىن. ال كەلەسى وليمپيادا تۋرالى نە ايتۋعا بولادى؟ پاريج وليمپياداسىنا بارۋ- بارماۋىم جايلى ەشتەڭەنى كەسىپ ايتا المايمىن. وتە اۋىر سۇراق. ماعان ءالى تىنىعىپ، دەنساۋلىعىمدى دۇرىستاۋ كەرەك. سىزدەرگە كورىنبەگەنمەن، مەنىڭ عانا جانىما باتاتىن جاراقاتتار بار. سولاردى ەمدەۋ كەرەك. جوعارىدا ايتتىم، مەنىڭ ارمانىم - وليمپيادا التىنىن الۋ. مىنە، ەكىنشى وليمپيادادا التىنعا سىنىق سۇيەم جەردەن توقتاپ وتىرمىن. مەن الماسام با، مەنىڭ باۋىرلارىم، قازاق دزيۋدوشىلارى وليمپيادا چەمپيونى اتانسا، سودان ارتىق باقىت جوق! جارىس مۇنىمەن بىتكەن جوق. ءالى ەلىمىزدىڭ نامىسىن قورعايتىن ءتورت بالۋانىمىز بار. سولارعا ساتتىلىك، جەڭىس تىلەيمىن»، - دەدى سمەتوۆ.
