الەكسەي سوي: بالالاردى وقۋ جىلى باستالعانعا دەيىن ۆاكسينالاۋ كۇن تارتىبىندە تۇرعان جوق

None
None
نۇر-سۇلتان. قازاقپارات - Pfizer ۆاكسيناسى قازاقستانعا اكەلىنسە، بالالار باسىم باعداردا بولادى.

ءبىراق ولاردىڭ ەكپەنى الۋى اتا-انالاردىڭ قالاۋىنداعى شارۋا. دەنساۋلىق ساقتاۋ ءمينيسترى الەكسەي سوي ورتالىق كوممۋنيكاتسيالار قىزمەتىندە وتكەن بريفينگىدە وسىنداي ۇستانىمىن ايتتى، دەپ حابارلايدى قازاقپارات ءتىلشىسى.

«ءبىز ءۇشىن حالىقتىڭ، سونىڭ ىشىندە بالالار قاۋىمىنىڭ ۆاكتسيناعا قول جەتكىزە الۋى وتە ماڭىزدى. بالالاردىڭ دا ەكپە الۋ قۇقىعى بولعانى وتە ماڭىزدى. ويتكەنى قازىر تەك ەرەسەكتەر عانا ۆاكسينا قابىلداي الادى. ءبىز بالالارعا ۆاكسينا ۇسىنىلاتىن مەرزىمدى ناقتى ايتا المايمىز. ويتكەنى بالالاردى ۆاكسينالاۋ پروتسەسى تەك ەرىكتى تۇردە بولادى. اتا-انالاردىڭ كەلىسىم بەرۋى ارقىلى عانا ىسكە اسادى. وسى بويىنشا ءتۇسىندىرۋ جۇمىستارىن جۇرگىزەمىز»، - دەدى ۆەدومستۆو باسشىسى.

ءمينيستردىڭ سوزىنە قاراعاندا، كەيبىر اتا-انالار بالالارىنا ۆاكسينا سالعىزعىسى كەلەتىنىن ايتىپ، تەزىرەك سوعان جارامدى ەكپە اكەلۋدى وتىنگەن.

«قازىر بىزگە وتە كوپ اتا-انا بالالارىن ۆاكتسينالاۋ تۋرالى ءوتىنىش ايتىپ جاتىر. وكىنىشكە قاراي، ازىرگە قازاقستاندا ونداي ۆاكسينا جوق. بالالارعا ەگۋگە كەڭەس بەرىلگەن ۆاكتسينا (Pfizer رەد.) جەتىپ، مۇمكىندىك پايدا بولعان كەزدە ءبىز بىردەن قولجەتىمدىلىكتى قامتاماسىز ەتەمىز. بۇل ۆاكسينا بويىنشا بالالار نەگىزگى باعداردا بولادى. ءوزىڭىز ايتقانداي 2 ميلليون بالا بار. ياعني، وسىنشا بالا ۆاكسينا الا الادى. ماسەلە قانشا اتا-انانىڭ بالاسىنا ۆاكسينا سالۋعا نيەت تانىتاتىنىندا. ونىڭ ءبارىن ۆاكسينالاۋ بارىسىندا كورەمىز. بالالارعا ەكپە سالۋ تەك ەرىكتى نەگىزدە جۇرەدى. سوندىقتان وقۋ جىلىنا دەيىن ولاردى ۆاكسينالاۋ ماسەلەسى كۇن تارتىبىندە تۇرعان جوق»، - دەدى دەنساۋلىق ساقتاۋ ءمينيسترى.

سوڭعى جاڭالىقتار