بوكس: باس باپكەر ءابىلحان امانقۇلدىڭ جاراقاتى تۋرالى پىكىر ءبىلدىردى
بوكستان قازاقستان ەرلەر قۇراماسىنىڭ باس باپكەرى عالىمبەك كەنجەبايەۆقا ب ا ق وكىلدەرى Zoom ارقىلى وتكەن تىكەلەي بايلانىستا وسىنداي سۇراق قويدى، دەپ حابارلايدى قازاقپارات ءتىلشىسى.
«ءابىلحان امانقۇلدىڭ جاراقاتى بولعانى راس. ءبىراق ەمدەلدى. سانكت-پەتەربۋرگتەگى جارىستا جاراقات الىپ، ءبىز ونى ءارى قاراي شىعارعان جوقپىز. وسى وليمپياداعا جاقسى دايىندالۋى كەرەك بولدى. ودان كەيىن ازيا چەمپيوناتىندا جاقسى ويناپ شىقتى. قولى سىر بەرگەن جوق. ول جاراقاتى قازىر مازالاپ جۇرگەن جوق. جەكپە-جەكتەردەن كەيىن قالاي بولاتىنىن كورەمىز. نەگىزى دايىندىعى جاقسى»، - دەدى باپكەر.
عالىمبەك كەنجەبايەۆ «قازاقستاننىڭ سالماعى» اتانىپ كەتكەن 69 كەلىدە باق سىنايتىن ابىلايحان ءجۇسىپوۆتىڭ دايىندىعى تۋرالى دا ايتتى.
«69 كەلىنى قازاقستاننىڭ سالماعى دەپ ءبارى ايتىپ ءجۇر عوي. ول سالماق نەگىزى قازاقستاندا پايدا بولعان جوق، قازاقستاندىكى دەپ ايتاتىنداي. ويتكەنى وليمپيادا بالەن جىلدان بەرى ءوتىپ كەلە جاتىر. ءيا، سوڭعى وليمپيادالاردا وسى سالماقتان التىن مەدال الىپ ءجۇرمىز. سول ءداستۇردى جالعاستىرساق دەگەن ءۇمىت بار بارىمىزدە. قازىر ابىلايحاننىڭ دەنى ساۋ، ءبارى جاقسى، دايىندىعى جامان ەمەس. ءبىرىنشى جەكپە-جەگى ءوتسىن. ءارى قاراي كورە جاتارمىز. بيىلعى 69 كەلىنى وتە مىقتى سالماق دەپ ايتۋعا بولادى. وزدەرىڭىز دە كورىپ وتىرسىزدار. كۋبانىڭ مىقتى بوكسشىسى بار، انگليانىڭ بوكسشىسى دا وسال ەمەس، الەم چەميپونى زامكوۆوي بار. ريودا كۇمىس مەدال العان بوكسشى ازەربايجان اتىنان شىعىپ جاتىر. سولاردىڭ ءبارى 69 كەلىنى باسەكە وتە مىقتى سالماق ەتىپ تۇر. ءبىراق ابىلايحان دا ولاردان وسال ەمەس»، - دەدى باس باپكەر.