+7 (701) 759 90 19
30 °С : نۇر-سۇلتان
31 °С : الماتى
USD 424.99 EUR 504.21
RUB 5.81 CNY 65.66
جاڭالىقتار

ۆاسيلي لەۆيت ەكىنشى اينالىمدا حۋليو لا كرۋزبەن ءتۇسۋى مۇمكىن - باس باپكەر

22 شىلدە 20:45
:ءبولىسۋ
ۆاسيلي لەۆيت ەكىنشى اينالىمدا حۋليو لا كرۋزبەن ءتۇسۋى مۇمكىن - باس باپكەر

نۇر-سۇلتان. قازاقپارات - بوكستان قازاقستان ەرلەر قۇراماسىنىڭ باس باپكەرى عالىمبەك كەنجەبايەۆ توكيو وليمپياداسىنا قاتىساتىن بوكسشىلاردىڭ جەرەبە قورىتىندىسى بويىنشا پىكىر ءبىلدىردى، دەپ حابارلايدى قازاقپارات ءتىلشىسى.

«جەرەبە تارتۋ ءراسىمى جاڭا عانا اياقتالدى. ءۇش سپورتشىمىز جەرەبە بويىنشا تارقاتىلعان سەبەتكە ءتۇستى. حالىقارالىق وليمپيادا كوميتەتىنىڭ ءوز رەيتينگىسىندە العاشقى تورتتىكتە تۇرعان بوكسشىلاردى جارتىلاي فينالعا دەيىن ءبىر-بىرىمەن جولىقپايتىنداي ەتىپ تارقاتىپ ءبولىپ تاستادى. سونىڭ ىشىندە ءبىزدىڭ ءۇش بوكسشىمىز بار. 81 كەلىدەگى بەكزات نۇرداۋلەتوۆ ءبىرىنشى رەيتينگتە تۇر. 91 كەلىدە ۆاسيلي لەۆيت ەكىنشى ءنومىر بولىپ تۇر. ەڭ اۋىر سالماقتا قامشىبەك قوڭقابايەۆ تا ءوز سالماعىندا ەكىنشى نومىردە تۇر. سولار جارتىلاي فينالعا دەيىن رەيتينگىنىڭ تورتتىگىندەگى بوكسشىلارمەن جارتىلاي فينالعا دەيىن جولىقپايتىنداي ەتىپ ءبولىندى. ءبىراق وليمپيادادا وڭاي جەكپە-جەكتەر بولمايدى. ارينە، سپورتشىلاردىڭ ءبارى مىقتى دايىندىقپەن كەلدى. جەرەبە وسىلاي ءتۇسىپ تۇر. قالعانىن رينگ كورسەتەدى»، - دەدى باس باپكەر.

سونداي-اق، ول بۇعان قاراپ الەمدىك رەيتينگتىڭ العاشقى ساتىسىندا تۇرعاندارعا جەرەبە جولداس بولدى دەپ ايتۋعا كەلمەيتىنىن ەسكەرتتى.

«بۇل جەردە بوكسشىلاردىڭ بىرىنە جەرەبە جولداس بولدى، ەكىنشىسىنە جەڭىل بولدى دەپ ايتۋعا كەلمەيدى. مىسالى، جاڭاعى تارقاتىلعان سەبەتتەگى ۆاسيلي لەۆيتتىڭ ءبىرىنشى يسپاندىق قارسىلاسى دا وڭاي سپورتشى ەمەس. ال كەلەسى اينالىمدا حۋليو لا كرۋزبەن ءتۇسۋى مۇمكىن. تارقاتىلعان سەبەتكە ءبىزدىڭ عانا ەمەس، الەمنىڭ تاڭداۋلى بوكسشىلارى دا كىرمەي قالعان. وليمپيادا چەمپيونى، سوڭعى الەم چەميپيوناتىنىڭ جەڭىمپازى وزبەكستاندىق زايروۆ تا تارقاتىلعان سەبەتكە تۇسكەن جوق. وليمپيادا كوميتەتى ءوز رەيتينگىسىن جاساپ، سونىڭ قورىتىندىسى بويىنشا تارقاتىپ وتىر. وتە مىقتى بوكسشىلاردىڭ تالايى ءنومىر العان جوق. حۋليو لا كۋرز دا سولاي. يسپاندىقتى جەڭىپ جاتسا، ۆاسيلي حۋليو لا كرۋزبەن شىعۋى مۇمكىن. جەرەبە قورىتىندىسى ءبىر قاراعاندا جامان ەمەس بولىپ كورىنگەنىمەن، ەكىنشى جاعىنان كۇردەلى بولىپ تۇر. سوندىقتان وسىنداي ساتتەر بار. رينگ كورسەتەدى. جارىس باستالعاندا كورەمىز ءبارىن»، - دەدى عالىمبەك كەنجەبايەۆ.

ەسكە سالساق، بۇگىن توكيو وليمپياداسىندا باق سىنايتىن بوكسشىلار اراسىندا جەرەبە تارتۋ ءراسىمى ءوتتى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات